काठमाडौँ । स्ट्रेट अफ हर्मुजमा तीनवटा व्यापारिक जहाजमाथि आक्रमण भएपछि संयुक्त राज्य अमेरिकाले इरानका सैन्य संरचनामाथि भीषण हवाई हमला गरेको छ। यसको जवाफमा इरानले अमेरिकी सैन्य उपस्थिति रहेका बहराइन र कुवेतलाई लक्षित गरी मिसाइल प्रहार गरेपछि मध्यपूर्वमा पुनः युद्धको जोखिम बढेको छ।
अमेरिकी सेनाको सेन्ट्रल कमान्डका अनुसार इरानी अर्धसैनिक इस्लामिक क्रान्तिकारी गार्डले व्यापारिक जहाज रोक्न प्रयोग गर्ने ६० भन्दा बढी तीव्र गतिका साना डुङ्गा, राडार र हवाई रक्षा प्रणालीलाई निशाना बनाइएको छ। आक्रमणसँगै वासिङ्टनले अन्तरिम सम्झौताअन्तर्गत इरानलाई खुला रूपमा कच्चा तेल बिक्री गर्न दिएको अनुमतिसमेत रद्द गरेको छ। इरानले भने अमेरिकी कारबाहीलाई ‘आतङ्कवादी कार्य’ भन्दै कडा जवाफ दिने चेतावनी दिएको छ।
यो तनाव इरानका सर्वोच्च नेता आयातोल्लाह अली खामेनीको अन्त्येष्टिको तयारी भइरहेका बेला चर्किएको हो। यसअघि खामेनीको अन्त्येष्टिपछि हर्मुज जलघाँटी खुला हुने र आणविक कार्यक्रमबारे वार्ता अघि बढ्ने अपेक्षा गरिएको थियो।
विश्वको करिब पाँचौँ भाग कच्चा तेल र प्राकृतिक ग्यास ओसारपसार हुने हर्मुज जलघाँटीको विवाद र इन्धन मार्गको सुरक्षालाई लिएर कतारलगायतका खाडी राष्ट्रहरूले इरानी कदमको विरोध गरेका छन्। अमेरिका र इरानबीच ६० दिनसम्म जहाजहरूलाई बिनाशुल्क आवतजावत गर्न दिने अन्तरिम सहमति भए पनि इरानले मार्ग निर्धारण र शुल्कको नयाँ प्रस्ताव राखेपछि विवाद उत्कर्षमा पुगेको हो।
प्रतिक्रिया