निगमले भन्यो- ‘बजारमा ग्याँस नपाए हटलाइनमा सम्पर्क गर्नु’

काठमाडौँ । नेपाल आयल निगमले बजारमा खाना पकाउने एलपी ग्याँस नपाएको खण्डमा तत्काल निगमको हटलाइन नम्बरमा सम्पर्क गर्न उपभोक्ताहरूसँग आग्रह गरेको छ । बजारमा ग्याँसको अभाव रहेको भन्दै गुनासो आउन थालेपछि निगमले विज्ञप्ति जारी गर्दै कार्यालय समयभित्र हटलाइन नम्बर ०१–५९७१९०२ मा सम्पर्क गरी जानकारी दिन अनुरोध गरेको हो ।

३१ असार २०२८३ को निर्णयअनुसार १४.२ केजी क्षमताको ग्यास सिलिन्डरको बिक्री–वितरण व्यवस्था लागू गरिएको उल्लेख गर्दै दैनिक मागअनुसार ग्यास आपूर्ति भइरहेको निगमले जनाएको छ । यद्यपि, विभिन्न सञ्चार माध्यममा ग्यास अभाव भएको समाचार आएपछि निगमले आफ्नो धारणा सार्वजनिक गरेको हो ।

यसैबिच, काठमाडौँ उपत्यकामा ग्याँसको माग र आपूर्तिलाई थप सहज बनाउन निगमले आफ्नो टेकुस्थित कार्यालयबाट समेत बिहान ११ः ०० देखि बेलुका ५ः ०० बजेसम्म उद्योगहरू मार्फत सोझै ग्याँस बिक्री वितरणको व्यवस्था मिलाएको छ ।

टेकु कार्यालयबाट नेपाल ग्याँस, एचपी ग्याँस, एभरेस्ट ग्याँस, सुगम ग्याँस र श्रीराम ग्याँस बिक्री वितरण हुनेछ । साथै निगमले आम उपभोक्तालाई अनावश्यक भण्डारण नगर्न र आवश्यकता अनुसार मात्र ग्याँस खरिद गर्नसमेत पुनः आग्रह गरेको छ ।