काठमाडौं। नेपालका वरिष्ठ युरोलोजिस्ट डा. सञ्जय खड्गी अन्तर्राष्ट्रियस्तरको प्रतिष्ठित ‘एसआईयू डिस्टिङ्गुइस्ड करियर अवार्ड २०२६’ बाट सम्मानित भएका छन्।
इटालीको फ्लोरेन्समा आयोजित इन्टरनेसनल सोसाइटी अफ युरोलोजी (एसआईयू) को ४६औँ कांग्रेसका अवसरमा नोभेम्बर ११ मा डा. खड्गीलाई उक्त सम्मान प्रदान गरिएको हो।
युरोलोजीको क्षेत्रमा लामो समयदेखि पुर्याएको योगदान, उपचार प्रविधिको विकास तथा ज्ञान र सीपको अन्तर्राष्ट्रिय आदान-प्रदानमा खेलेको भूमिकाको कदरस्वरूप उनलाई यो सम्मान प्रदान गरिएको हो।
सम्मान प्राप्त गरेपछि डा. खड्गीले सामाजिक सञ्जालमार्फत यो उपलब्धिलाई व्यक्तिगत उपलब्धिमा मात्र सीमित नरहेको बताएका छन्। उनले यसलाई नेपाल र नेपाली युरोलोजी क्षेत्रका लागि गौरवको क्षणका रूपमा लिँदै आगामी दिनमा पनि युरोलोजीको विकास, ज्ञान हस्तान्तरण, युवा युरोलोजिस्टको प्रशिक्षण तथा बिरामी सेवामा निरन्तर योगदान गर्ने प्रतिबद्धता व्यक्त गरेका छन्।
उनले सम्मानका लागि एसआईयू नेतृत्व, अवार्ड समिति, आफ्ना गुरु, सहकर्मी, साथीभाइ तथा आफ्नो चिकित्सकीय यात्रामा साथ दिने सबैप्रति आभार व्यक्त गरेका छन्। प्राप्त सम्मानलाई उनले आफ्नो देश नेपाल र आफ्नो यात्रामा जोडिएका सबैप्रति समर्पित गरेका छन्।
नेपालमा मिनी–पीसीएनएल प्रविधि भित्र्याउने चिकित्सक
डा. खड्गीको चिकित्सकीय यात्रामा मिनी–पीसीएनएल (Mini-PCNL) प्रविधिको नेपालमा सुरुआतलाई महत्वपूर्ण योगदानका रूपमा लिइन्छ।
सन् २००५ मा उनले नेपालमा मिनी–पीसीएनएल प्रविधि भित्र्याएका थिए। मिर्गौलामा हुने पत्थरीको उपचारमा प्रयोग हुने यो प्रविधिले परम्परागत शल्यक्रियाको तुलनामा सानो चिराबाट पत्थरी निकाल्न सहयोग गर्छ।
नेपालमा यो प्रविधिको प्रयोग र विस्तारसँगै डा. खड्गीले यससम्बन्धी आफ्नो अनुभव र सीप अन्तर्राष्ट्रियस्तरमा समेत बाँड्दै आएका छन्। विभिन्न देशमा आयोजित युरोलोजीसम्बन्धी सम्मेलन तथा कार्यक्रममा उनले प्रत्यक्ष शल्यक्रिया प्रदर्शन, प्रस्तुति र प्रशिक्षणमा सहभागिता जनाएका छन्।
भारत, जर्मनी, चीन, मोरक्को, कुवेत, कतार, पाकिस्तान, टर्की, मलेसिया र फ्रान्सलगायत देशमा मिनी–पीसीएनएल प्रविधिसम्बन्धी प्रत्यक्ष शल्यक्रिया प्रदर्शन तथा ज्ञान आदान–प्रदानमा सहभागी भएको विवरण पनि उनको व्यावसायिक यात्रासँग जोडिएको छ।
डा. खड्गीले हजारौँ जटिल युरोलोजिकल शल्यक्रिया सम्पन्न गरिसकेका छन्। विशेषगरी मिर्गौलाको पत्थरी तथा एन्डोयुरोलोजी क्षेत्रमा उनको लामो अनुभव रहेको छ।
अन्तर्राष्ट्रिय मञ्चमा नेपाली युरोलोजिस्टको पहिचान
डा. खड्गी अन्तर्राष्ट्रिय युरोलोजी सम्मेलनहरूमा विज्ञ तथा आमन्त्रित फ्याकल्टीका रूपमा समेत सहभागी हुँदै आएका छन्। अमेरिकन युरोलोजिकल एसोसिएसन (एयूए), एसआईयू लगायतका अन्तर्राष्ट्रिय संस्थाका कार्यक्रमहरूमा उनले युरोलोजी तथा एन्डोयुरोलोजीसम्बन्धी विषयमा आफ्नो अनुभव प्रस्तुत गर्दै आएका छन्।
उनको व्यावसायिक संलग्नता उपचारमा मात्र सीमित छैन। नयाँ प्रविधि र उपचार पद्धतिबारे चिकित्सकबीच ज्ञान आदान–प्रदान तथा नयाँ पुस्ताका युरोलोजिस्टलाई सीप हस्तान्तरणमा समेत उनले निरन्तर भूमिका खेल्दै आएका छन्।
यही क्रममा उनी वर्ल्ड कंग्रेस अफ इन्डोयुरोलोजीमा अन्तर्राष्ट्रिय फ्याकल्टी तथा अतिथि वक्ताका रूपमा सहभागी हुने नेपाली युरोलोजिस्टका रूपमा समेत परिचित छन्।
अन्तर्राष्ट्रिय युरोलोजी समुदायमा नेपालबाट निरन्तर प्रतिनिधित्व गर्दै आएका डा. खड्गीका लागि फ्लोरेन्समा प्राप्त ‘एसआईयू डिस्टिङ्गुइस्ड करियर अवार्ड २०२६’ उनको दशकौँ लामो चिकित्सकीय यात्राको महत्वपूर्ण अन्तर्राष्ट्रिय सम्मान बनेको छ।
सम्मानपछि व्यक्त गरेको सन्देशमा डा. खड्गीले आफ्नो उपलब्धिलाई नेपालसँग जोड्दै अन्तर्राष्ट्रिय युरोलोजीको मञ्चमा नेपालको प्रतिनिधित्व गर्न पाएकोमा गर्व व्यक्त गरेका छन्।
उनले आगामी दिनमा पनि बिरामीको सेवासँगै युरोलोजीको विकास, चिकित्सकीय ज्ञानको आदान-प्रदान र युवा युरोलोजिस्टको क्षमता अभिवृद्धिमा योगदानलाई निरन्तरता दिने बताएका छन्।
फ्लोरेन्समा प्राप्त यो सम्मानले नेपाली युरोलोजी क्षेत्रमा लामो समयदेखि भइरहेको उपचार, प्रविधि विकास र अन्तर्राष्ट्रिय ज्ञान आदान-प्रदानको योगदानलाई विश्वस्तरीय मञ्चमा थप स्थापित गरेको छ।
प्रतिक्रिया