काठमाडौं, मंसिर ६। प्रधानमन्त्री वालेन्द्र शाह (बालेन) आज दुईदिने औपचारिक भ्रमणका लागि भारतको राजधानी नयाँदिल्ली प्रस्थान गर्दैछन्। भारतीय प्रधानमन्त्री नरेन्द्र मोदीको निमन्त्रणामा हुन लागेको यो भ्रमण प्रधानमन्त्री शाहले पदभार सम्हालेपछि गर्न लागेको पहिलो विदेश भ्रमण हो।
प्रधानमन्त्री शाह नेपाल वायुसेवा निगमको नियमित उडानमार्फत आज दिउँसो १ः४५ बजे नयाँदिल्ली प्रस्थान गर्ने कार्यक्रम रहेको छ। भ्रमण टोलीमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनालसहित ३४ सदस्य सहभागी हुने बताइएको छ।
भ्रमणका क्रममा आज साँझ भारतीय विदेशमन्त्री एस. जयशंकरले प्रधानमन्त्री शाहसँग शिष्टाचार भेट गर्ने कार्यक्रम छ। त्यसैगरी सोमबार भारतीय प्रधानमन्त्री नरेन्द्र मोदीसँग प्रधानमन्त्री शाहको द्विपक्षीय भेटवार्ता हुनेछ।
उक्त भेटवार्तामा नेपाल–भारत सम्बन्धलाई थप सुदृढ बनाउने, दुई देशबीचको व्यापार तथा पारवहन, ऊर्जा सहकार्य, लगानी, पूर्वाधार विकास, हवाई मार्ग र आर्थिक साझेदारीलगायतका विषयमा छलफल हुने अपेक्षा गरिएको छ।
विशेषगरी नेपालको जलविद्युत् उत्पादन तथा भारतमा विद्युत् निर्यात, सीमापार प्रसारण लाइन विस्तार, व्यापार सहजीकरण र विकास निर्माणका परियोजनालाई भ्रमणका महत्त्वपूर्ण एजेन्डाका रूपमा हेरिएको छ।
नेपाल र भारतबीच ऐतिहासिक, सांस्कृतिक, धार्मिक तथा आर्थिक सम्बन्ध रहँदै आएको छ। खुला सीमा, व्यापार, रोजगारी, पारवहन र ऊर्जा सहकार्यका कारण दुवै देश एकअर्काका महत्त्वपूर्ण साझेदार हुन्।
प्रधानमन्त्री शाहको यस भ्रमणलाई नयाँ सरकारको भारतसँगको सम्बन्ध र आगामी कूटनीतिक प्राथमिकता बुझ्ने अवसरका रूपमा पनि हेरिएको छ। भ्रमणका क्रममा हुने उच्चस्तरीय छलफल र सहमतिले आगामी दिनमा नेपाल–भारत सम्बन्धलाई कुन दिशामा अघि बढाउँछ भन्ने विषय चासोका साथ हेरिएको छ।




प्रतिक्रिया