मधेशका नवनियुक्त मुख्यमन्त्री यादवले आज शपथ लिँदै


६ मंसिर, काठमाडौं । मधेश प्रदेशका नवनियुक्त मुख्यमन्त्री सरोजकुमार यादवले आज पद तथा गोपनीयताको शपथ लिने भएका छन्।

प्रदेश प्रमुखको कार्यालयका अनुसार मुख्यमन्त्री यादवले आइतबार बिहान १० बजे पद तथा गोपनीयताको शपथ लिने कार्यक्रम तय भएको छ।

यादव शनिबार मुख्यमन्त्रीमा नियुक्त भएका थिए। नेपालको संविधानको धारा १६८ को उपधारा (३) बमोजिम प्रदेशसभामा सबैभन्दा ठूलो दलको हैसियतमा जनता समाजवादी पार्टी (जसपा) नेपालका संसदीय दलका नेता यादवलाई प्रदेश प्रमुख सुरेन्द्र लाभ कर्णले मुख्यमन्त्री नियुक्त गरेका हुन्।

प्रदेशसभामा कुनै पनि दलले स्पष्ट बहुमत प्राप्त गर्न नसकेपछि संविधानको व्यवस्थाअनुसार ठूलो दलको संसदीय दलका नेताका रूपमा यादव मुख्यमन्त्री नियुक्त भएका हुन्।

आज हुने शपथग्रहणसँगै यादवले मधेश प्रदेश सरकारको नेतृत्व औपचारिक रूपमा सम्हाल्नेछन्।