“ओली र मबीच मत भिन्नता छैन, सरकार गिराउने अफवहामात्रै हो”

दाङ, ६ कात्तिक । सत्तारुढ दल नेपाल कम्युनिष्ट पार्टीका वरिष्ठ नेता माधवकुमार नेपालले प्रधानमन्त्री केपी शर्मा ओली र आफ्नो बीचमा कुनै प्रकारको मतभिन्नता नरहेको स्पष्ट पारेका छन् ।

नेकपा दाङले दशैँका अवसरमा मंगलबार घोराहीमा आयोजना गरेको शुभकामना आदानप्रदान कार्यक्रममा बोल्दै उनले यस्तो बताएका हुन् । नेता नेपालले प्रधानमन्त्री ओलीको सरकार गिराउने विषय अफवाह मात्रै भएको स्पष्ट पारे ।

उनले भने, “हाम्रोबीचमा केही समस्या छैन, मिडियाले हल्ला फैलाएको मात्रै हो, वामदेव निर्वाचन लड्ने कुरा पनि धेरै हल्ला भयो, त्यो सबै झुट हो ।”

नेता नेपालले नेपालको कम्युनिष्ट सरकार विश्वकै लागि प्रेरणाको विषय बनेको उल्लेख गर्दै नेपाली काङ्ग्रेसबाट सरकारले रचनात्मक प्रतिपक्षको अपेक्षा गरेको बताए ।