“लोकप्रिय हुन्छ भने डरले सरकारलाई प्रतिपक्षले घेराबन्दीमा पार्न खोज्यो” 

पर्वत, १७ मङ्सिर । नेपाल कम्युनिस्ट पार्टी (नेकपा)का स्थायी कमिटी सदस्य देवेन्द्र पौडेलले सरकारलाई चौतर्फी घेराबन्दीमा पार्न खोजिएको बताउनुभएको छ ।

दक्षिण पर्वतको पैयूँ गाउँपालिकास्थित हुवासमा आज आयोजित शहीद स्मृतिसभामा उहाँले भन्नुभयो, “जनतामा लोकप्रिय हुन्छ भने डरले सरकारलाई प्रतिपक्षले घेराबन्दीमा पार्न खोजिएको छ ।”

नेकपाका केन्द्रीय सदस्य गुप्त हमाल र विजय गुरुङले पार्टीको निर्णय र सङ्गठनको मर्म बमोजिम नै सरकार अगाडि बढ्नुपर्नेमा जोड दिनुभयो । यसअघि नेता पौडेलले हुवासमा निर्मित शहीद गेटको पनि उद्घाटन गर्नुभयो ।

‘चिसापानी–हुवास–बर्राचौर सडक कालोपत्र 

यसैगरी हुवासमा आयोजित एक कार्यक्रममा प्रतिनिधिसभा सदस्य पदम गिरीले चसापानीदेखि हुवास हुँदै बर्राचौर जोड्ने सडक कालोपत्र गर्ने प्रतिबद्धता व्यक्त गर्नुभयो ।

यहाँको सडक कालोपत्र, एक घर, एक धारा र सिँचाइको व्यवस्थापन गर्नु नै आफ्नो प्रमुख एजेण्डा भएको बताउँदै उहाँले चिसापानीदेखि बर्राचौरसम्मको सडकलाई राष्ट्रिय प्राथमिकताको सडक बनाउन आफूले सक्रिय भूमिका खेलेकाका कारण चालू आवमा सो सडकका लागि रु ५० लाख रकम विनियोजन भएको जानकारी दिनुभयो । (रासस)