यो संसद् चल्दैन, चाँडोभन्दा चाँडो चुनावमा जानुपर्छः महेश बस्नेत

काठमाडौं, भदौ २४ । नेकपा एमालेका नेता एवं सांसद महेश बस्नेतले संसद् चल्ने स्थिति नभएकाले अग्रीम चुनावमा जानुपर्ने बताएका छन् । उनले सभामुख अग्निप्रसाद सापकोटाले पदीय जिम्मेवारीको गलत व्याख्या गरेर समानान्तर न्यायालय चलाउन खोजेको आरोपसमेत लगाए ।

एमसीसीबारे पठाइएका प्रश्न र जवाफ नाटक भएको पनि उनको दोषारोपण छ । उनले भने, “११ बुँदे प्रश्न र जवाफ नाटक मात्र हो । सतहमा आएका प्रश्न र उत्तरले एमसीसी पारित गर्न भूमिका खेल्दैन । सरकारले जालझेलपूर्ण ढंगले सदन छलेर पास गर्ने योजना बनाएको छ । अब प्रचण्ड र बाबुरामको राष्ट्रवादको परीक्षण हुन्छ । एमाले फुटाएर बहुमत पुग्यो भन्दै प्रधानमन्त्री जुँगा मुसार्दै हिँड्नुभएको छ । एमालेलाई विश्वासमा लिन सरकारले के प्रस्ताव ल्याउँछ, त्यस आधारमा निर्णय हुन्छ ।”