अच्युत रेग्मी : काठमाडौँ, १२ पुस । दैनिक हजारौँ सार्वजनिक यातायात ओहोरदोहोर गर्ने रत्नापार्क र त्यस आसपासका क्षेत्रमा बस स्टप परिवर्तन हुँदा यात्रु मर्कामा परेका छन् ।
काठमाडौँ महानगरपालिका, यातायात व्यवस्था विभाग, सडक विभाग र महानगरीय ट्राफिक प्रहरी महाशाखाको सहकार्यमा टुँडिखेल आसपासको क्षेत्रमा सवारी आवागमन व्यवस्थित बनाउन बस स्टप परिवर्तन गर्दा यात्रु मर्कामा परेका हुन् ।
तारकेश्वर नगरपालिका मनमैजु बस्ने कमला गुरुङ भृकुटीमण्डपस्थित रत्नराज्य लक्ष्मी क्याम्पस जान हिँड्नुभयो । अरु दिन भृकुटीमण्डप ओर्लने उहाँ बस बिसौनी परिवर्तन भएपछि जमल ओर्लनुप¥यो । “जनतालाई दुःख दिएर के गर्न खोजेको हो, कुनै जानकारी बिना नै एक्कासि जमल ओर्लनुप¥यो ?”, उहाँले गुनासो गर्नुभयो । सुन्धारा जान लगनखेलबाट बस चढ्नुभएका अनिल ठकुरीलाई रत्नापार्कमा रोकिदियो । “म त सुन्धारामा झार्दिन्छ भनेर यो बस चढेको हो, किन रत्नापार्कमा झार्दियो”, उहाँले रिसाउँदै भन्नुभयो । कमला र अनिलजस्ता लाखौँ यात्रुले अहिले उक्त समस्या भोग्नुपरेको छ ।
काठमाडौँ महानगरपालिका, यातायात व्यवस्था विभाग, सडक विभाग र महानगरीय ट्राफिक प्रहरी महाशाखाले यही पुस १ गतेदेखि एउटा रुटको सवारी साधनलाई टुँडिखेल वरपरको दुई ठाउँमा मात्र यात्रु ओराल्ने र चढ्ने व्यवस्था मिलाएपछि यात्रुले उक्त समस्या भोग्नुपरेको हो । पहिला एउटै रुटको बसले चार ठाउँमा यात्रु ओराल्ने तथा उकाल्ने गरेकोमा अहिले कम भएपछि यात्रु मर्कामा परेका हुन् ।
महानगरीय ट्राफिक प्रहरी महाशाखाका प्रमुख एवं प्रहरी वरिष्ठ उपरीक्षक वसन्त पन्तले भद्रगोल भएको ट्राफिक व्यवस्था सहज बनाउन यात्रु ओर्लने र चढ्ने केन्द्रहरु परिवर्तन गरेको बताउनुहुन्छ । “एकै ठाँउबाट सवारी साधनले यात्रु ओराल्ने तथा चढाउने गर्दा सवारी साधन आगमनमा समस्या प¥यो, सवारी साधन जाम हुने भएकाले छुट्टाछुट्टै बस स्टप निर्धारण गरेका हौँ”, उहाँ भन्नुहुन्छ ।
यात्रु ओर्लने र चढ्ने स्थान व्यवस्थित बनाउँदा केही समस्या भएको उहाँको भनाइ थियो । यात्रुलाई आफूले चढ्ने सवारी साधनको ठाउँ र सडकको बारेमा पनि महाशाखाले जानकारी दिन थालेको उहाँले बताउनुभयो ।
नयाँ निर्धारण गरिएको बस बिसौनी सामाखुशी हुँदै गोँगबु चल्ने सवारी साधन, सीतापाइला हुँदै इचङ्गु चल्ने, नयाँ बजार हुँदै बालाजु, तारकेश्वर चल्ने सवारीलाई जमल र आरएनएसीमा यात्रु आर्लने तथा चढ्ने व्यवस्था गरिएको छ । दिगो सार्वजनिक यातायात, संयुक्त यातायात, कपन बङ्गलामुखी यातायात, सिटी यातायात र अन्नपूर्ण सेवालाई काठमाडौँ मल अगाडि यात्रु ओराल्ने तथा उकाल्ने व्यवस्था मिलाइएको छ ।
यसैगरी बूढानीलकण्ठ, विशालनगर, कपन, धूमबराही, धापासी, मण्डिखाटारलगायतका क्षेत्रमा जाने सवारी साधनलाई पनि काठमाडौँ मल अगाडि यात्रु ओराल्ने तथा उकाल्ने व्यवस्था गरिएको छ । साझा यातायात, पाटनढोका यातायात, शिवपुरी बूढानीलकण्ठ यातायात र हामी सबैको यातायातलाई आरएनएसी अगाडि यात्रु ओराल्ने तथा उकाल्ने व्यवस्था मिलाइएको छ । स्वयम्भू, गौशाला, तीनचुले, इमाडोल सडकमा चल्ने टेम्पोलाई पनि काठमाडौँ मल अगाडिबाट यात्रु ओर्लने र चढ्ने व्यवस्था मिलाइएको छ ।
लगनखेल, भैँसेपाटी, गोठाटार यातायात, लालुपाते यातायात कोटेश्वर, अन्नपूर्ण यातायात, लगनखेल, कलङ्की निलो माइक्रो, दक्षिणकाली माइक्रोबस समिति, जोरपाटी माइक्रो, बूढानीलकण्ठ बस समिति, न्यू अन्नपूर्ण टेम्पो, कान्तिपुर यातायातलाई रत्नपार्कबाट यात्रु आर्लने तथा चढ्ने व्यवस्था मिलाइएको छ । साझा यातायात, हामी सबैको यातायात, शिवपुरी बूढानीलकण्ठ सेवा, ललितपुर यातायात, नेपाल यातायात गोठाटार, जनता यातायात कलङ्कीलाई राष्ट्रिय सभागृह अगाडि यात्रु उकाल्ने तथा ओराल्ने व्यवस्था मिलाइएको ट्राफिक प्रहरी महाशाखाले जनाएको छ ।
प्रतिक्रिया