तरकारीको भाऊ सुन्दा तर्सनुपर्ने

काठमाडौं उपत्यकामा प्रति केजी पचास रुपैयाँभन्दा कमले कुनैपनि तरकारी एक केजी खरिद गर्न नसकिने भएको छ । सबैभन्दा सस्तो भनिएको बन्दाको मूल्य प्रतिकेजी ५० पुगेको छ भने लौकाको मूल्य ६० रुपैयाँ छ । मूल्यवृद्धि आकाशिएपछि उपत्यका र मुख्य शहरहरुमा तरकारी खरिद गर्न जानेहरु तर्सने अवस्था बनेको छ ।

कालिमाटी फलफूल तथा तरकारी बजार विकास बोर्डका अनुसार गोलभेडा ठूलोको मूल्य १२० छ भने सानोको एक सय छ । आलुको मूल्य पनि प्रतिकेजी ५० रुपैयाँ पुगेको छ । मूलाको मूल्य समेत प्रतिकेजी ५० रुपैयाँ पुगेको छ । प्रतिकेजी प्याजको ५० रुपैयाँ पुगेको छ ।
मौसमी तरकारीको मूल्य समेत आकाशिएपछि उपभोक्ता मारमा परेका छन् । मूल्यवृद्धिले उपभोक्ताको भान्छामा राम्रा तरकारी पुग्न कठिन हुने भएको छ । डल्ले च्याउको मूल्य प्रतिकेजी ३४५ छ । प्रोटिनयुक्त तरकारी कुरीलो प्रतिकेजी ३४० छ ।

सर्वसाधारणले फलफूल किन्न नसक्ने अवस्था बन्दै गएका ेछ । विभिन्न जातका स्याऊ प्रतिकेजी दुई सय देखि साँढे चार सय सम्म छ । कागती महँगो भएको छ । एउटा गोटा कागतीको १० देखि २० रुपैयाँ सम्म पर्न जान्छ । आँप डेढ सय देखि दुई सयसम्म पुगेको छ ।

तरकारीको मूल्यवृद्धिले उपभोक्ताको मासिक घरखर्च आकाशिएको छ । पछिल्लो समय मूल्यवृद्धि चर्किएपनि सरकारले ठोस कदम चाल्न सकेको छैन । विभिन्न बहानामा मूल्यवृद्धि गर्ने तर नियमनको कमजोरीले समायोजन नहुने हुँदा उपभोक्ता मारमा परेका छन् ।

भारतको चुनावमा सीमा नाका बन्द हुने गर्दा गोलभेडाको मूल्य वृद्धि भएको भनिएपनि चुनावी नतिजा आएर भारतमा मोदी सरकार बनिसक्दा पनि मूल्य घटेको छैन ।

स्रोतः कालिमाटी तरकारी तथा फललफूल बजार विकास बोर्ड