अमेरिकासँग वार्ता गर्नु पूर्ण रूपमा हानिकारक हुनेछ: इरानी सांसद

तेहरान । अमेरिकी राष्ट्रपति डोनाल्ड ट्रम्पले इरानसँगको युद्धविराम अनिश्चित अवधिसम्म लम्ब्याएका छन् । उनको यो निर्णयप्रति इरानको उच्च तहबाट प्रतिक्रिया आउन थालेको छ । मध्यरात पछिसमेत अधिकारीहरूले सामाजिक सञ्जालमार्फत धारणा सार्वजनिक गरिरहेका छन् ।

इरानी संसदका सदस्य महमूद नबाभियनले सामाजिक सञ्जाल एक्समा लेख्दै अब अमेरिकासँग वार्ता गर्नुको तुक नभएको बताएका छन् । ‘यहाँबाट अमेरिकासँग वार्ता गर्नु पूर्ण रूपमा हानिकारक र तुकहीन हुनेछ’ उनले भनेका छन् । उनी इस्लामाबादमा भएको इरान–अमेरिका वार्ताको पहिलो चरणमा सहभागी प्रतिनिधिमण्डलका सदस्य पनि थिए ।

अर्कोतर्फ, इरानको शीर्ष सैन्य कमाण्ड खातम अल(अन्बिया मुख्यालयका प्रवक्ताले चेतावनी दिँदै कुनै पनि आक्रमण भएमा इरानी सेनाले “पहिले नै तय गरिएका लक्ष्यहरूमा झन् कडा प्रहार गर्ने” बताएका छन् । उक्त चेतावनीले अमेरिका र इजरायल दुबैलाई लक्षित गरेको देखिन्छ । नबावियनको टिप्पणी र सैन्य वक्तव्य दुवैमा युद्धविराम थपिएको विषयमा कुनै उल्लेख गरिएको छैन, यद्यपि ती प्रतिक्रिया ट्रम्पको घोषणापछि इरानी सञ्चारमाध्यमहरूमा सार्वजनिक भएका हुन् ।

अहिलेसम्म इरानी विदेश मन्त्रालय वा यसका अधिकारी वा इरानी संसदका सभामुख वा प्रमुख वार्ताकार मोहम्मद बाघेर गालिबाफलगायत उच्च अधिकारीहरूबाट औपचारिक प्रतिक्रिया आउन बाँकी छ ।