काठमाडौं, वैशाख २३ । नेकपा (एमाले) सुदूरपश्चिम प्रदेश संसदीय दलको नेतृत्व परिवर्तनको बहस तीव्र बन्दै जाँदा प्रदेशको सत्ता समीकरण नै फेरिन सक्ने संकेत देखिएको छ। दलको नेता चयनसम्बन्धी छलफलका लागि प्रदेशका अधिकांश एमाले सांसद अहिले काठमाडौं आएका छन् । पार्टी अध्यक्ष केपी सर्मा ओलीसँगको छलफलपछि मात्रै यस विषयमा अन्तिम निर्णय हुने बताइएको छ।
हालका संसदीय दलका नेता राजेन्द्र सिंह रावल बाहेक अधिकांश एमाले सांसद कांग्रेस नेतृत्वको प्रदेश सरकारप्रति असन्तुष्ट देखिएका छन्। उनीहरू मुख्यमन्त्री कमल बहादुर शाहको कार्यशैलीप्रति असन्तुष्ट छन्। नियुक्तिदेखि बजेट वितरणसम्म एकलौटी भएको आरोप लगाउँदै एमालेका नेताहरू सरकारप्रति रुष्ट बनेका हुन्।
यसैबीच, एमालेभित्रै नयाँ राजनीतिक समीकरणको खोजी सुरु भएको छ। असन्तुष्ट समूहले नेकपासँग मिलेर नयाँ सरकार गठन गर्ने सम्भावनाबारे छलफल अघि बढाइरहेको स्रोतले जनाएको छ। यदि केन्द्रस्तरमा सहमति जुटेमा एमालेले वर्तमान सरकारलाई दिएको समर्थन फिर्ता लिएर नेकपासँग सत्ता साझेदारी गर्न सक्ने चर्चा छ।
सुदूरपश्चिम प्रदेशसभामा एमालेका ११ जना सांसद छन् भने नेकपाका (एक निलम्बितसहित) २२ जना सांसद छन्। यी दुई दलबीच सहकार्य भएमा स्पष्ट बहुमत पुग्ने देखिन्छ, जसले नयाँ सरकार गठनको बाटो खोल्न सक्छ। यसरी, एमालेको दल नेता परिवर्तनको विषय केवल आन्तरिक व्यवस्थापनमा सीमित नरही प्रदेश सरकारकै भविष्यमाथि प्रभाव पार्ने महत्वपूर्ण राजनीतिक मोडका रूपमा हेरिएको छ।
प्रतिक्रिया