चिनियाँ राष्ट्रपतिको टिप्पणीप्रति ताइवानको कडा प्रतिक्रिया,भन्यो-‘असुरक्षाको स्रोत चीनको धम्की हो’

ताइपेई । ताइवानले चीनका राष्ट्रपति सी जिनपिङको भनाइप्रति कडा प्रतिक्रिया दिँदै क्षेत्रीय असुरक्षाको मुख्य स्रोत नै चीन भएको आरोप लगाएको छ । सीले ताइवानको स्वतन्त्रता र शान्तिबिच तालमेल भएको बताएका थिए ।

‘यस क्षेत्रको असुरक्षाको एक मात्र स्रोत चीनको सैन्य धम्की हो’ ताइवान सरकारकी क्याबिनेट प्रवक्ता मिसेल लीले भनिन् । क्षेत्रीय सुरक्षा सुनिश्चित गर्न रक्षा क्षमताको निरन्तर विस्तार र संयुक्त प्रतिरोध रणनीति आवश्यक रहेको उनले बताइन् ।

यो प्रतिक्रिया सीले अमेरिकी राष्ट्रपति डोनाल्ड ट्रम्पसँगको वार्तामा ताइवानलाई ‘चीन–अमेरिका सम्बन्धको सबैभन्दा महत्त्वपूर्ण मुद्दा’ भन्दै गलत तरिकाले ह्यान्डल गरे स्थिति निकै घातक हुनसक्ने बताएपछि आएको हो । चीनको सत्तारूढ कम्युनिस्ट पार्टीले ताइवानलाई आफ्नो भू–भाग मान्दै आएको छ । आवश्यक परे बल प्रयोग गरेर एकीकरण गर्ने सम्भावना पनि उसले नकारेको छैन ।

‘ताइवानको स्वतन्त्रता र स्ट्रेटको शान्ति आगो र पानी जत्तिकै असङ्गत छ,’ सीले भनेका छन् । ‘ताइवान स्ट्रेटमा शान्ति र स्थिरताको रक्षा गर्नु चीन र अमेरिका बिचको सबैभन्दा ठुलो साझा दायित्व हो,’ सीले भने ।

अर्कोतर्फ, अमेरिका ताइवानसँग औपचारिक नभए पनि घनिष्ठ सम्बन्ध राख्छ । तर सैन्य हस्तक्षेप गर्ने वा नगर्ने विषयमा स्पष्ट नीति नअपनाई ‘रणनीतिक अस्पष्टता’ कायम राख्दै आएको छ । एजेन्सी