फुटबल खेलाडी सनम विक बचाउने महान् अभियानमा ऋषि धमला, सहयोगी हातहरूलाई आह्वान !

काठमाडौँ । ‘सेवा नै सबैभन्दा ठूलो धर्म हो’ भन्ने प्रगाढ भावना र दृढ संकल्पका साथ नेपाली पत्रकारिता जगत्का ऊर्जावान् व्यक्तित्व एवं स्वतन्त्र नागरिक अभियान नेपालका अध्यक्ष ऋषि धमला यतिबेला देश दौडाहामा निस्किएका छन् । आफ्नो पेशागत व्यस्तताका बाबजुद पनि धमला देशका विभिन्न कुनाकाप्चामा पुगेर गम्भीर प्रकृतिका बिरामीहरूको जीवन रक्षा गर्ने एक महान् र पवित्र योजनामा अहोरात्र खटिएका छन् । मानवताको यो महाअभियानमा उनले संसारभर रहेका सहयोगी हातहरूलाई एकजुट हुन र खुला हृदयले सहयोग गर्न जोडदार आग्रह समेत गरेका छन् ।

यसै क्रममा, मोरङको उर्लाबारी नगरपालिका वडा नं. ३ निवासी २० वर्षीय युवा सनम बिक यतिबेला बोनम्यारो क्यान्सरजस्तो भयानक रोगसँग लडिरहेका छन् । खेलकुदको क्षेत्रमा, विशेष गरी फुटबल खेलमा उत्कृष्ट प्रतिभा प्रदर्शन गर्दै आएका यी जेहेन्दार खेलाडीको पारिवारिक आर्थिक अवस्था अत्यन्तै दयनीय रहेको छ ।

चिकित्सकहरूका अनुसार सनमको ज्यान बचाउन बोनम्यारो प्रत्यारोपण गर्नु अनिवार्य छ र त्यसका लागि उनकै आफ्नै बहिनीको बोनम्यारो म्याच भइसकेको छ । तर, आर्थिक अभावका कारण यो उपचार प्रक्रिया अगाडि बढ्न सकेको थिएन । उदीयमान खेलाडी सनमको जीवन रक्षाका लागि स्थानीय युवा सुशन लिम्बूको नेतृत्वमा ‘सनम बचाउ अभियान’ सुरु गरिएको छ । लिम्बूको समूहले अथक् प्रयास गर्दै हालसम्म झन्डै २५ लाख रुपैयाँ संकलन गरिसकेको छ ।

यद्यपि, चिकित्सकहरूका अनुसार बोनम्यारो प्रत्यारोपणका लागि कम्तीमा ५० लाख रुपैयाँ खर्च लाग्ने अनुमान गरिएको छ, जुन रकम संकलन हुन अझै बाँकी छ ।

यो संवेदनशील र कारुणिक खबर प्राप्त हुनासाथ स्वतन्त्र नागरिक अभियान नेपालका अध्यक्ष चर्चित पत्रकार धमलाले सनमलाई बचाउन आफूले पूर्णरूपमा साथ र सहयोग गर्ने प्रतिबद्धता जनाएका छन् । धमलाले एउटा देशको युवा नागरिक र होनहार खेलाडीलाई बचाउनुपर्नेमा जोड दिँदै सनम बचाउ अभियानमा आफ्नो संस्था र व्यक्तिगत तर्फबाट सम्पूर्ण शक्ति लगाउने घोषणा गरेका हुन् ।

त्यति मात्र होइन, पत्रकार धमलाले काठमाडौँस्थित वर्ड अस्पताललाई समेत मानवीय नाताले सनमको उपचारमा अधिकतम सहुलियत र सम्भव भएसम्मको सम्पूर्ण प्राविधिक तथा व्यावहारिक सहयोग पुर्‍याउन विशेष आह्वान गरेका छन् ।

‘हामी एउटा राष्ट्रको प्रतिभालाई यसरी गुमाउन सक्दैनौँ । सनमलाई बचाउनु हामी सबैको साझा कर्तव्य हो,’ पत्रकार धमलाले देश–विदेशमा रहेका नेपालीहरूलाई अपिल गर्दै भने, ‘म सम्पूर्ण सहयोगी मनहरू, नागरिक समाज र विभिन्न संघ–संस्थाहरूलाई यस महान् कार्यमा जोडिन र सनमको जीवन रक्षाका लागि सहयोगी हातहरू अगाडि बढाउन हार्दिक आग्रह गर्दछु ।’

धमलाको यो सक्रियता र मानवीय सेवाप्रतिको लगावलाई स्थानीयस्तर र सामाजिक सञ्जालहरूमा व्यापक प्रशंसा गरिएको छ । यसले सनम बचाउ अभियानमा नयाँ ऊर्जा र आशा जगाएको स्थानीय संयोजक सुशन लिम्बूले बताएका छन् ।