बेइजिङ । चीनको दक्षिणी क्षेत्रमा आएको मेसाक आँधीका कारण आएको भीषण बाढीमा परेर मृत्यु हुनेको सङ्ख्या ३९ पुगेको छ । चिनियाँ अधिकारीहरूका अनुसार सो बाढीमा परेर ३९जनाको मृत्यु भएको हो ।
यसैबिच ताइवान र चीनको पूर्वी तटीय क्षेत्रका बासिन्दा अर्को शक्तिशाली आँधी बाभीको सामना गर्ने तयारीमा छन् । चीनका अधिकारीहरूका अनुसार नान्निङ सहरको पूर्वी क्षेत्रमा रहेको बाँध भत्किँदा मात्रै २६ जनाको मृत्यु भएको छ । नान्निङका उपमेयर डिङ वेईले पत्रकार सम्मेलनमार्फत उक्त जानकारी दिएका हुन् । ग्वाङ्सी क्षेत्रमा अझै ९ जना बेपत्ता छन् ।
मेसाकका कारण गत शनिबारदेखि ग्वाङ्सीमा अभूतपूर्व वर्षा भएको थियो । अत्यधिक वर्षापछि जलाशयहरू फुटेका, बस्तीहरू डुबानमा परेका र हजारौँ मानिस घर तथा अन्य भवनमा दिनौँसम्म फसेका थिए । यसअघि बाढीमा ६ जनाको मृत्यु भएको जानकारी दिइएको थियो ।
चीनको राष्ट्रिय मौसम विज्ञान केन्द्रका अनुसार ग्वाङ्सीका केही क्षेत्रमा १० देखि ४० सेन्टिमिटरसम्म वर्षा भएको छ भने सबैभन्दा प्रभावित स्थानहरूमा ९० सेन्टिमिटरभन्दा बढी वर्षा मापन गरिएको छ ।
बाँध र जलाशय फुटेपछि आएको ठुलो बाढीले धेरै सहर तथा बस्ती डुबानमा परेका छन् । उद्धारका लागि ड्रोन र करिब ५ हजार ७०० डुङ्गा परिचालन गरिएको छ । तीव्र बहाव र बाढीले बगाएर ल्याएको फोहोरका बिच उद्धारकर्मीहरूले फसेका नागरिकसम्म पुग्न कठिन प्रयास गरिरहेका छन् ।
हालसम्म करिब १ लाख ३० हजार मानिसलाई सुरक्षित स्थानमा सारिएको छ । अधिकारीहरूका अनुसार बाढीको पानी बिस्तारै घट्न थाले पनि आगामी दुई दिनसम्म केही क्षेत्रमा थप वर्षा हुने सम्भावना छ ।
हेङ्झोउ सहरलगायत सबैभन्दा प्रभावित क्षेत्रहरूमा हिलो र फोहोर हटाउने तथा सङ्क्रमण रोक्न कीटाणुनाशक छर्किने काम भइरहेको छ । डिङ वेईका अनुसार सडक मर्मतको काम जारी छ भने ६० हजारभन्दा बढी घरमा विद्युत् सेवा पुनः सञ्चालन गरिएको छ । एजेन्सी
प्रतिक्रिया