काठमाडौँ । सुनसरीको देवानगञ्जमा साउन १० गते दुई पक्षबीच भएको हिंसात्मक झडप र त्यसपछिको सुरक्षा अवस्थालाई लिएर सिंहदरबारमा राष्ट्रिय सुरक्षा परिषद्को ४३औँ बैठक सम्पन्न भएको छ।
देवानगञ्ज गाउँपालिका–३, कप्तानगन्जमा उत्पन्न साम्प्रदायिक तनावका क्रममा एक जनाको मृत्यु भएपछि बिग्रिएको शान्ति सुरक्षाको अवस्था, त्यसको सम्भावित प्रभाव र आगामी रणनीतिबारे बैठकमा विस्तृत समीक्षा गरिएको प्रधानमन्त्रीको निजी सचिवालयले जनाएको छ।
बैठकमा सुरक्षा निकायका तर्फबाट देवानगञ्ज घटनापछिको पछिल्लो अवस्थाबारे ब्रिफिङ गरिएको थियो। राजनीतिक दल, स्थानीय सरोकारवाला र सुरक्षा निकायको संयुक्त पहलमा अहिले सुनसरीको स्थिति बिस्तारै सामान्यीकरणतर्फ उन्मुख भइरहेको जानकारी गराइयो।
यद्यपि, तराई मधेशका संवेदनशील क्षेत्रहरूमा सामाजिक सद्भाव खलबल्याउने सानातिना घटनाले पनि ठूलो रूप लिन सक्ने भन्दै सुरक्षा परिषद्ले गम्भीर चासो व्यक्त गरेको छ।
‘भविष्यमा यस्ता अवाञ्छित घटना दोहोरिन नदिन सबै सुरक्षा निकाय र सम्बन्धित सरोकारवालासँग सुदृढ समन्वय गरिनेछ। सामाजिक सद्भाव र राष्ट्रिय एकताको भावना कायम राख्न सरकार पूर्ण रूपमा प्रतिबद्ध छ’ – राष्ट्रिय सुरक्षा परिषद् ।
बैठकमा साम्प्रदायिक तथा स्थानीय सुरक्षा चुनौती मात्र नभई मनसुनजन्य विपद् प्रतिकार्यको पूर्वतयारीबारे पनि गहन छलफल भएको छ। देशका विभिन्न भागमा हुनसक्ने पहिरो, बाढी र डुबानजस्ता विपद्का घटनामा खोज, उद्धार तथा राहत कार्यलाई समयमै प्रभावकारी बनाउन निकायगत समन्वय सुदृढ गर्ने निर्णय परिषद्ले गरेको छ।
प्रधानमन्त्री वालेन्द्र शाहको अध्यक्षतामा बसेको उक्त बैठकमा देशको राष्ट्रिय सुरक्षा र शान्ति सुरक्षासँग प्रत्यक्ष जोडिएका शीर्ष अधिकारीहरूको उपस्थिति थियो ।
प्रतिक्रिया