काठमाडौं, भदौ २३ । पूर्वप्रधानमन्त्री सुशीला कार्कीले मुलुकमा सुशासन, जवाफदेहिता, पारदर्शिता र विधिको शासन सुनिश्चित गर्न सरकारलाई आग्रह गरेकी छन्। परिवर्तनको माग गर्दै युवाहरू फेरि सडकमा आउनुपर्ने अवस्था सिर्जना गर्न नहुनेमा उनले जोड दिएकी छन्।
जेन–जी आन्दोलनको पहिलो वार्षिकोत्सवका अवसरमा सन्देश जारी गर्दै कार्कीले आन्दोलनका क्रममा ज्यान गुमाएकाहरूप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरेकी छन्।
सुशासन, जवाफदेहिता र उज्ज्वल भविष्यको माग गर्दै आन्दोलनमा उत्रिएका युवाहरूका माग दबाउने प्रयास हुँदा निर्दोष युवाहरूले ज्यान गुमाउनुपरेको उनले बताएकी छन्। त्यस्तै, धेरै युवाहरू गम्भीर घाइते भई जीवनभर अपांगताको सामना गर्नुपरेको कार्कीको भनाइ छ।
कार्कीले जेन–जी आन्दोलनलाई नेपालको इतिहासमा गहिरो घाउका रूपमा चित्रण गर्दै आन्दोलनका क्रममा सार्वजनिक तथा निजी सम्पत्तिका साथै राष्ट्रिय सम्पदामा समेत ठूलो क्षति पुगेको उल्लेख गरेकी छन्।
यस्ता घटना पुनः दोहोरिन नदिन सबै सरोकारवालाले इमानदारी, जिम्मेवारी र सतर्कतापूर्वक आफ्नो दायित्व निर्वाह गर्नुपर्नेमा उनले जोड दिएकी छन्।
जेन–जी आन्दोलनले राज्य र राजनीतिक नेतृत्वलाई स्पष्ट सन्देश दिएको उल्लेख गर्दै कार्कीले संसद्मा दुई तिहाइ बहुमत हुँदैमा मात्र राजनीतिक स्थायित्व सुनिश्चित नहुने बताएकी छन्।
उनले भनेकी छन्, “सुशासनको अभावमा संसद्मा दुई तिहाइ बहुमत भए पनि स्थायित्व सुनिश्चित हुन सक्दैन। राजनीतिक स्थायित्व संसद्को अंकगणितले होइन, सत्तामा रहेकाहरूको चरित्र र कार्यशैलीले निर्धारण गर्छ।”
सरकारले सुशासन सुदृढ गर्न, भ्रष्टाचार नियन्त्रण गर्न, विधिको शासन कायम गर्न तथा नागरिकको सम्मान सुनिश्चित गर्न प्रभावकारी कदम चाल्नुपर्ने कार्कीले बताएकी छन्।
जेन–जी आन्दोलन र त्यसबाट भएको ठूलो जनधनको क्षति भएको एक वर्ष नपुग्दै मुलुकले भोटेकोशी बाढीका रूपमा अर्को ठूलो संकट सामना गरिरहेको पनि कार्कीले उल्लेख गरेकी छन्।
विपद्को सामना गर्न राष्ट्रिय एकताको आह्वान गर्दै उनले भनेकी छन्, “एकअर्काको साथ दिऔँ, एकअर्काको पीडा कम गरौँ र एकताबद्ध भएर विपत्तिको सामना गरौँ।”
प्रतिक्रिया