दार्चुला । जिल्ला सदरमुकाम खलंगामा निर्माणाधीन ५० शय्याको जिल्ला अस्पतालको भवन आगामी पुस मसान्तसम्म सम्पन्न गर्ने गरी तीव्र काम भइरहेको छ ।
गत साउनको अन्तिम साता पूर्वाधार विकासमन्त्री सुनिल लम्सालले अनुगमन गर्दै निर्माण कम्पनीलाई कालोसूचीमा राख्ने निर्देशन दिएपछि कामले गति लिएको हो । “पछिल्लो समय भवन निर्माणलाई तीव्र रूपमा अगाडि बढाइएको छ । चौथो तलाको ढलानको तयारी भइरहेको छ, असोज तेस्रो साताभित्र ढलान भइसक्नेछ”, सघन सहरी तथा भवन निर्माण आयोजना बैतडीका इन्जिनियर विशाल श्रेष्ठले भने । लिफ्टसहितको अत्याधुनिक सुविधा सम्पन्न भवनको हालसम्म ६५ प्रतिशत भौतिक र ५२ प्रतिशत वित्तीय प्रगति भएको छ ।
“अहिले भुइँतला र पहिलो तल्लाको भित्री भागमा काम भइसकेको छ भने दोस्रो र तेस्रो तलामा काम भइरहेको छ”, श्रेष्ठले भने । नेपाल सरकारले सघन सहरी तथा भवन निर्माण आयोजनामार्फत २०७८ साल असार २४ गते श्यामसुन्दर गोर्खा, वाईआर जेभीसँग निर्माणको ठेक्का सम्झौता भएको थियो ।
२६ करोड ४८ लाख २७ हजार ४०४ को लागतमा बन्ने उक्त भवन २०८१ असार २३ गते सम्पन्न गर्नुपर्ने सम्झौता थियो । निर्माण कम्पनीले समयमै काम सम्पन्न नगरेपछि पुनः म्याद थप गरी आगामी पुस मसान्तसम्मको समय तोकिएको छ ।
थपिएको समयसीमाभित्र काम सम्पन्न गर्ने गरी निर्माण कम्पनीले कामलाई गति दिएको इन्जिनियर श्रेष्ठले बताए । रासस
प्रतिक्रिया