कर्णाली प्रदेशको दुर्गम जिल्ला हुम्लाबाट मोडलिङ तथा अभिनयलाई आफ्नो मुख्य पेसा बनाउँदै आरती बुढा निरन्तर अघि बढिरहेकी छन्। कला क्षेत्रमा केही गर्ने दृढ इच्छाशक्ति, अनुशासन, लगनशीलता र निरन्तरको मेहनतले उनले नेपाली मोडलिङ तथा अभिनय क्षेत्रमा आफ्नो छुट्टै पहिचान बनाउन सफल भएकी छन्।
आरतीले ‘कला घर’मा थिएटर अभिनयका गुरु गोविन्द सुनारबाट अभिनय प्रशिक्षण लिएर आफ्नो कलाकारिता यात्रा सुरु गरेकी हुन्। अभिनयप्रतिको रुचिलाई निरन्तर अभ्यास र मेहनतमार्फत निखार्दै उनले मोडलिङ तथा अभिनयलाई आफ्नो करियरका रूपमा अघि बढाउँदै आएकी छन्।
उनले सुदूरपश्चिमका दर्जनौँ देउडा गीतका म्युजिक भिडियोमा अभिनय तथा मोडलिङ गरिसकेकी छन्। त्यस्तै, ‘अछेता’ नाटकमा समेत अभिनय गरेकी आरतीले म्युजिक भिडियो तथा नाट्य क्षेत्रमा गरेको योगदानका लागि विभिन्न अवार्ड र सम्मानसमेत प्राप्त गरेकी छन्।
म्युजिक भिडियो र नाटकमा मात्र सीमित नरही आरतीले नेपाली चलचित्रमा समेत अभिनय गरेकी छन्। फरक–फरक विधाका सिर्जनामा आफूलाई प्रस्तुत गर्दै उनले आफ्नो अभिनय क्षमतालाई थप परिष्कृत बनाउँदै लगेकी छन्।
दुर्गम भूगोल हुम्लाबाट कलाकारिताको क्षेत्रमा आफ्नो पहिचान स्थापित गर्न निरन्तर संघर्षरत आरतीको यात्रा धेरैका लागि प्रेरणादायी बन्न सक्छ। प्रतिभासँगै अनुशासन, लगनशीलता र मेहनतलाई निरन्तरता दिँदै अघि बढिरहेकी आरतीले आगामी दिनमा नेपाली मोडलिङ तथा चलचित्र क्षेत्रमा थप प्रभावकारी काम गर्दै सफलताको नयाँ उचाइ हासिल गर्ने लक्ष्य लिएकी छन्।
प्रतिक्रिया