निर्वाचन आयोग पुगेर पनि किन बैठकमा बसेनन् ओली ?


काठमाडौँ । स्थानीय तहको आसन्न निर्वाचनको तयारीका सन्दर्भमा निर्वाचन आयोगले बोलाएको सर्वदलीय बैठकमा शीर्ष नेताहरू जुटिरहँदा नेकपा एमालेका अध्यक्ष केपी शर्मा ओली भने आयोग परिसरमा पुगेलगत्तै बाहिरिए ।

आयोगले निर्वाचनको पूर्वतयारी तथा प्राविधिक विषयमा परामर्श गर्न प्रमुख राजनीतिक दलका शीर्ष नेताहरूलाई छलफलका लागि आमन्त्रण गरेको थियो। सोही निमन्त्रणाबमोजिम आयोग पुगेका अध्यक्ष ओली औपचारिक छलफल सुरु हुनुअघि नै फर्किए। बाहिरिने क्रममा उनले आफ्नो जरुरी काम परेकाले बैठकमा बस्न नसकेको संक्षिप्त प्रतिक्रिया दिएको बताइएको छ।

ओली बाहिरिए पनि आयोगको बैठकमा रास्वपा सभापति रवि लामिछाने, कांग्रेस सभापति गगन थापा तथा नेकपा संयोजक पुष्पकमल दाहाललगायतका नेताहरू सहभागी भए ।

निर्वाचन आयोगका पदाधिकारी र दलका नेताहरूबीच स्थानीय तह निर्वाचनको कार्यतालिका र तयारीका विविध पक्षमा केन्द्रित रहेर छलफल चल्यो । तर निर्वाचनजस्तो संवेदनशील विषयको परामर्श बैठकमा एमाले अध्यक्ष ओली पुगेलगत्तै फर्किनुलाई राजनीतिक वृत्तमा अर्थपूर्ण रूपमा हेरिएको छ।