संस्थापन पक्षले कारबाही गरेलगत्तै विश्वप्रकाशको प्रतिक्रिया : विशेष महाधिवेशनले अब सही नेतृत्व दिनेछ

काठमाडौं, ३० पुष । नेपाली कांग्रेसका महामन्त्री तथा दोस्रो ऐतिहासिक विशेष महाधिवेशन आह्वानकर्ता विश्वप्रकाश शर्माले आफू र अर्का महामन्त्री गगन थापाले देशलाई बदल्ने प्रयास गरेको र यसमा दुवै जना दृढ रहेको बताएका छन् ।

विधानअनुरुपको विशेष महाधिवेशनले देशलाई सही दृष्किोण दिएको दाबी गर्दै अब सही नेतृत्व दिने ठोकुवा गरेका छन् । पार्टी सभापति शेरबहादुर देउवा पक्षधर नेताहरुले महामन्त्रीद्धय र सहमहामन्त्री फरमुल्लाह मन्सुरलाई पाँच वर्षको लागि पार्टीबाट निश्काषन गरेपछि शर्माको यस्तो प्रतिक्रिया आएको हो ।

उनले फेशबुकमा लेखेका छन्-

सहमतिका लागि आज बिहान प्रस्तावित यी ८ बुँदामध्ये कुन बुँदा काँग्रेस र देशको अहितमा थियो र छ ?
१) बिशेष महाधिवेशनको स्वामित्व साझा रूपमा लिनेे l
२) बिशेष महाधिवेशन परिमार्जन सहित पारित प्रस्तावहरु कार्यान्वयन गर्ने l
३) सभापतिले सक्रिय भुमिका निर्वाह नगर्ने, सो क्रममा उम्मेदवारी पत्रमा सभापतिले हस्ताक्षर नगर्ने
४) उम्मेदवार चयन गर्न संसदीय बोर्ड गठन गर्ने
५) आगामी निर्वाचनमा एक ढिक्का भएर मैदानमा जाने
६) कुनैपनी दलसँग गठबन्धन नगरेर नेपाली काँग्रेसले आगामी निर्वाचनमा एक्लै प्रतिस्पर्धा गर्ने l
७) नेपाली काँग्रेसका तर्फबाट आगामी निर्वाचनमा प्रधानमन्त्रीको उम्मेदवार घोषणा गरेर जाने l
८) यी सबै कार्य समन्वय र कार्यान्वयन गराउन ५ सदस्यीय संरचना गठन गर्ने l जसमा – कार्यवाहक सभापति र दुई महामन्त्री बाहेक थप दुई नेताहरू रहने l
मुस्कुराउँदै फेरि पढें यी बुँदा, मेरो प्रतिक्रिया केवल यत्ति छ- काँग्रेस र देशलाई बदल्ने प्रयासमा गगन थापा र म, दुवै दृढ छौँ l बिधान अनुरूपको बिशेष महाधिवेशनले देशलाई सहि दृष्टिकोण दिएको छ, अब सहि नेतृत्व दिनेछ !