निर्वाचनको मुखमा ओलीको टिप्पणी : सरकारले अझै पनि निष्पक्ष निर्वाचनको वातावरण बनाउन सकेको छैन

दमक, १६ फागुन। एमाले अध्यक्ष तथा झापा–५ का उम्मेदवार केपी शर्मा ओलीले सरकारले अझै पनि निष्पक्ष निर्वाचनको वातावरण बनाउन नसकेको टिप्पणी गरेका छन् । मुलुकको सार्वभौम संसदलाई ध्वङ्सको माध्यमबाट बलजफ्ती विघटन गरिएपछि देश सङ्कटतर्फ धकेलिएको उनको आरोप छ ।

झापाको दमकमा अनेरास्ववियूले आयोजना गरेको ‘बासँग विद्यार्थी’ कार्यक्रममा बोल्दै उनले यस्तो बताएका हुन् । उनले देशमा आइपरेको सङ्कटबाट मुक्ति दिलाउन एमाले चुनावमा गएको समेत बताए । उनले एमाले चुनावबाट न भाग्ने भएकाले देशैभरि पार्टी चुनावमा केन्द्रित भएको उल्लेख गर्दै आगामी चुनावबाट एमालेनै पहिलो शक्ति बन्ने र देशमा आइपरेका समस्याहरूको समाधान निकाल्ने बताए ।

पूर्वप्रधानमन्त्री ओलीले चुनावमा हुने कुनै पनि प्रकारका धाँधली एमालेलाई मान्य नहुने बताए । चुनावलाई निष्पक्ष, धाँधलीरहित बनाउन सरकार गम्भीर नदेखिएको उनको भनाइ छ । उनले युवाहरूलाई विभिन्न माध्यमबाट छरिने भ्रममा नपर्न र त्यस्ता भ्रमहरू चिर्ने काममा लाग्न आग्रह गरे ।