सभामुख चयनका लागि आज मनोनयन दर्ता, पर्सी पदवहाली

काठमाडौं, चैैत २० । सङ्घीय संसद् सचिवालयले पर्सि आइतबार हुने प्रतिनिधिसभाको सभामुख चयनका लागि आज मनोनयन दर्ताको समय तोकिएको छ । संसद् सचिवालयले जारी गरेको सभामुखको चुनावी कार्यतालिका अनुसार आज बिहान ११ बजेदेखि २ बजेसम्म प्रतिनिधिसभाका कुनै सदस्यलाई सभामुख पदमा निर्वाचित गरियोस् भनी नियमावालीको ढाँचामा प्रस्तावको सूचना (मनोनयन) संसद् सचिवालय, सिंहदरबारमा दर्ता गर्ने कार्यक्रम रहेको छ ।

त्यस्तै आजै दिउँसो साढे २ बजेदेखि तोकिएको समयमा दर्ता भएका उम्मेदवारीको सूचना दर्ता क्रमअनुसार सूची प्रकाशन हुनेछ । दर्ता भएका प्रस्तावका सूचनालाई पर्सि आइतबार हुने प्रतिनिधिसभाको बैठकमा प्रस्तावकले प्रस्ताव र समर्थकले समर्थन गर्ने तथा सामूहिक छलफलपछि निर्णयार्थ प्रस्तुत गर्ने कार्यक्रम छ । राष्ट्रिय स्वतन्त्र पार्टी (रास्वपा) ले प्रतिनिधिसभाको सभामुख पदका लागि पार्टी उपसभापति डोलप्रसाद अर्याललाई प्रस्ताव गर्ने निर्णय गरिसकेको छ ।

त्यसैगरी, राष्ट्रियसभा उपाध्यक्ष पदको चुनाव भने सोमाबार हुने भएको छ । निर्वाचन कार्यतालिकाअनुसार पर्सि आइतबार दिउँसो २ः३० बजेदेखि ३ः३० बजेसम्म राष्ट्रियसभाका कुनै सदस्यलाई सभाको उपाध्यक्ष मतमा निर्वाचित गरियोस् भनी प्रस्तावको सूचना दिइने छ ।

दिउँसो ४ बजे दर्ता भएका प्रस्तावकको सूचनाको दर्ता सूची प्रकाशन हुने छ । सोमबार दिउँसो १ बजे बस्ने राष्ट्रियसभाको बैठकले उपाध्यक्ष चयन गर्ने कार्यतालिका रहेको छ ।