यात्रुलाई दुःख दिएको आरोपमा विमानस्थलबाट १८ जना पक्राउ

काठमाडौँ, २१ चैत । त्रिभुवन अन्तर्राष्ट्रिय विमानस्थल परिसरबाट प्रहरीले १८ जनालाई नियन्त्रणमा लिएको छ। यात्रुलाई दुःख दिएको आरोपमा उनीहरूलाई पक्राउ गरिएको जिल्ला प्रहरी परिसर काठमाडौंले जनाएको छ।

प्रहरीका अनुसार उनीहरूले विमानस्थलमा आएका यात्रुलाई जबरजस्ती तान्ने, हैरानी दिने, विभिन्न प्रलोभन देखाएर आफू सम्बन्धित होटलमा लैजाने र त्यसबापत कमिसन लिने गरेका थिए।

पक्राउ पर्नेमा सर्लाहीका सूर्य माझी, बाँकेका एकेश तामाङ, पाँचथरका प्रेम कुमार मगर, सिन्धुलीका राजकुमार राई, मकवानपुरका मगलमान घलान, पाँचथरका खगेन्द्र लिम्बू, मोरङका आशिस खतिवडा, मकवानपुरका विश्व मोक्तान, धनुषाका वीरेन्द्र झा, सिरहाका लडा मिया, मोरङका पर्शुराम राई, रामेछापका सन्तु तामाङ, धनुषाका रघुवीर साह, महोत्तरीका राजिब कुमार रावत, धनुषाका सरोज कुमार महतो, मकवानपुरका अजय लामा, झापाका केशव लिम्बू, बझाङका रामप्रसाद जोशी र बझाङका विमलराज जोशी छन् ।

उनीहरूमाथि थप अनुसन्धान गरिरहेको प्रहरी परिसर काठमाडौंका एसपी पवन भट्टराईले जानकारी दिएका छन् ।