ट्रम्पको चीन भ्रमण टोलीमा को-को छन् सहभागि ?

वासिङ्टन डीसी । अमेरिकी राष्ट्रपति डोनाल्ड ट्रम्प चीन भ्रमणमा निस्किएका छन् । भ्रमणमा आफ्नो साथमा ट्रम्पले अमेरिकी व्यापार र प्रविधि क्षेत्रका चर्चित प्रमुख कार्यकारी अधिकृतहरूलाई पनि चीन लगेका हुन् ।

बेइजिङमा हुने औपचारिक भ्रमणमा घरेलु चिप निर्माता कम्पनी एनभिडियाका सीईओ जेन्सेन हुआङ, एप्पलका सीईओ टिम कूक, टेस्ला र स्पेशएक्सको सीईओ एलन मस्कलगायत सहभागी रहेका छन् । साथै मेटा, भिसा, जेपी मोर्गन चेज, बोइङका प्रतिनिधिहरू पनि टोलीमा समावेश छन् । बीबीसीका अनुसार ट्रम्पसँग चीन जाने अमेरिकी प्रतिनिधिमण्डलमा एक दर्जनभन्दा बढी प्रमुख कार्यकारीहरू सहभागी छन् ।

यो भ्रमणलाई अमेरिका–चीन सम्बन्धका दृष्टिले महत्त्वपूर्ण मानिएको छ । पछिल्लो समय दुई देशबीच आर्थिक तथा प्रविधि प्रतिस्पर्धा तीव्र बन्दै गएको छ । यस्तोमा ट्रम्प र उनको चिनियाँ समकक्षी सि जिनपिङबिच हुन लागेको यस भेटवार्तालाई निकै महत्वका साथ हेरिएको छ । वि

शेषगरी एनभिडियाका प्रमुख जेन्सेन हुआङ अन्तिम समयमा भ्रमण टोलीमा समावेश हुनुलाई अर्थपूर्ण मानिएको छ । एनभिडियाका उन्नत कृत्रिम बौद्धिकतामा आधारित चिपहरू अहिले अमेरिका–चीन प्रतिस्पर्धाको केन्द्रमा रहेका छन् । हुआङ ट्रम्पको विज्ञान तथा प्रविधि सल्लाहकार परिषद्मा पनि सदस्य छन् । यस परिषद्मा फेसबुकका मार्क जुकरबर्ग र ओर्याकलका सह–संस्थापक ल्यारी एलिसन पनि छन् ।

यस भ्रमणमा सहभागी अन्य प्रमुख कार्यकारीहरूमा केली ओर्टबर्ग, रायन म्याकइनर्नी, स्टीफन स्वार्जम्यान, जेन फ्रेजर, डेभिड सोलोमन टाइफ माइकल मिबाच पनि छन् । माइक्रोन टेक्नोलोजीका सीईओ सञ्जय मेहरोत्राको सहभागिता पनि चासोका साथ हेरिएको छ ।

यस कम्पनीका केही चिपहरूलाई चीनले सन २०२३ मा राष्ट्रिय सुरक्षाको कारण देखाउँदै महत्त्वपूर्ण पूर्वाधारमा प्रयोग गर्न प्रतिबन्ध लगाएको थियो । यस कदमका कारण चीनमा आफ्नो व्यापार प्रभावित भएको कम्पनीले जनाएको थियो । विश्लेषकहरूका अनुसार सेमिकन्डक्टर प्रविधि अहिले पनि अमेरिका–चीन आर्थिक सम्बन्धको मुख्य केन्द्रमा रहेको छ, यद्यपि प्रविधि नियन्त्रण र निर्यात प्रतिबन्धलाई लिएर तनाव जारी छ । एजेन्सी