चीनले अमेरिकासँग २०० वटा बोइङ विमान किन्ने

बेइजिङ । चीनले अमेरिकी विमान निर्माता कम्पनी बोइङसँग २०० वटा विमान खरिद गर्ने औपचारिक घोषणा गरेको छ ।

यो सम्झौता अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच बेइजिङमा भएको शिखर वार्तापछि सार्वजनिक गरिएको हो । यो सम्झौतालाई विश्वका दुई ठूला अर्थतन्त्रबीच व्यापार सम्बन्ध सुधारतर्फको महत्वपूर्ण कदमका रूपमा हेरिएको छ ।

चीनको वाणिज्य मन्त्रालयका अनुसार सम्झौताअन्तर्गत अमेरिकाले विमान इन्जिनका पार्टपुर्जा तथा अन्य कम्पोनेन्ट आपूर्तिको ग्यारेन्टी दिनेछ । साथै, दुवै देशले अघिल्लो अतिरिक्त भन्सार महसुल ९ट्यारिफ०सम्बन्धी अस्थायी युद्धविरामलाई विस्तार गर्ने र करिब ३० अर्ब डलरभन्दा बढी मूल्यका वस्तुहरूमा भन्सार शुल्क घटाउने दिशामा काम गर्ने सहमति गरेका छन् ।

७५० विमानसम्म पुग्ने सम्भावना

बोइङका प्रमुख कार्यकारी अधिकृत केली ओर्टबर्गले यो प्रारम्भिक चरण मात्र भएको र भविष्यमा थप अर्डर आउन सक्ने बताएका छन् ।

प्रारम्भिक चरणमा २०० थान विमानपछि कुल अर्डर ७५० सम्म पुग्न सक्ने सम्भावना पनि उल्लेख गरिएको छ । ट्रम्पले पनि विमानहरू समावेश भएको ठूला व्यापार सम्झौताहरू भएको दाबी गरेका छन् ।

यो सम्झौता अमेरिका र चीनबीच जारी व्यापार तनावलाई केही हदसम्म कम गर्ने प्रयासका रूपमा हेरिएको छ । यसअघि दुई देशबीच एक अर्काको देशबाट आउने सामानमा अतिरिक्त भन्सार महसुल ट्यारिफ लगाउन बन्द गर्ने सहमति अघिल्लो वर्ष अक्टोबरमा भएको थियो, जसअन्तर्गत केही कर कटौती र दुर्लभ खनिज निर्यात प्रतिबन्धमा अस्थायी रोक लगाइएको थियो ।

सी जिनपिङले बेइजिङमा भ्लादिमिर पुटिनसँग पनि उच्चस्तरीय वार्ता गरिरहेको समयमा यो घोषणा भएको हो । एजेन्सी