राज्यकाे अर्बाैँ रकम बचत हुनेगरी सफ्टवेयरकाे लागि छुट्टै कार्यालय खोल्दै सरकार

काठमाडौं । सरकारले देशभरिका सबै सरकारी कार्यालयहरूमा प्रयोग हुने सफ्टवेयर बनाउने गरी छुट्टै कार्यालय गठन गर्ने तयारी गरेकाे छ। मन्त्रिपरिषद् तथा प्रधानमन्त्री कार्यालयमातहतमा रहनेगरि छुट्टै कार्यालय गठन गर्ने तयारी भइरहेको प्रधानमन्त्री कार्यालयका एक कर्मचारीले जानकारी दिए ।

उनका अनुसार सम्भवतः आगामी साउनदेखि सञ्चालनमा ल्याइनेछ ।

हाल सबै सरकारी कार्यालयले निजी क्षेत्रबाट सफ्टवेयर खरिद गर्ने गर्छन्। यसबाट एक वर्षमा २० अर्बभन्दा बढी रुपैयाँ सरकारको खर्च हुने गरेको छ। सरकारी कार्यालयमा सरकारले आफैं सफ्टवेयर बनाएमा २० अर्ब रुपैयाँबाट दुई अर्बमा झर्ने प्रधानमन्त्री कार्यालयको अनुमान छ । स्रोतका अनुसार नयाँ गठन हुन लागेको कार्यालयको नाम सफ्टवेयर विकास तथा सञ्चालन केन्द्र हुनेछ।

उक्त कार्यालय गठन तथा सञ्चालनका लागि कार्यविधिको मस्यौदा तयार भइसकेको र चाँडोभन्दा उक्त मस्यादा पास गर्ने तयारी छ ।