अख्तियारमा कार्यरत प्रहरीको काज सरुवाबारे प्रहरीको प्रष्टीकरण, के भन्यो ?

काठमाडौँ । अख्तियार दुरुपयोग अनुसन्धान आयोगमा कार्यरत केही सिनियर प्रहरी अधिकृतहरूको काज तथा सरुवा सम्बन्धी विषयलाई लिएर विभिन्न सञ्चार माध्यम र सामाजिक सञ्जालमा आएका समाचारप्रति नेपाल प्रहरीले गम्भीर ध्यानाकर्षण भएको जनाएको छ।

नेपाल प्रहरी प्रधान कार्यालयले एक प्रेस विज्ञप्ति जारी गर्दै उक्त सरुवा नियमित प्रशासनिक प्रक्रिया भएको स्पष्ट पारेको हो।

नेपाल प्रहरी प्रधान कार्यालय, मानवस्रोत विकास विभाग, कर्मचारी प्रशासन शाखाको मिति २०८३ असार १८ र १९ गतेको पत्रानुसार सम्बन्धित प्रहरी अधिकृतहरूको काज र सरुवा गरिएको प्रहरीले जनाएको छ। यो सरुवा कुनै विशेष घटना, अनुसन्धान, उजुरी वा अन्य कुनै विषयसँग सम्बन्धित नभई प्रचलित कानुनी व्यवस्था र स्थापित प्रशासनिक प्रक्रिया बमोजिम नियमित कर्मचारी व्यवस्थापनको सिलसिलामा गरिएको विज्ञप्तिमा उल्लेख छ।

नेपाल प्रहरीका केन्द्रीय प्रहरी प्रवक्ता, प्रहरी नायव महानिरीक्षक अबि नारायण काफ्लेले जारी गरेको विज्ञप्तिमा भनिएको छ, नेपाल प्रहरी सदैव कानुनी व्यवस्था, पारदर्शिता, निष्पक्षता तथा स्थापित प्रशासनिक प्रणालीको पालना गर्दै आफ्नो जिम्मेवारी निर्वाह गर्न प्रतिबद्ध छ।’