सभामुख अर्याल र युएईका विदेश व्यापार मन्त्रीबिच भेटवार्ता

काठमाडौँ । सभामुख डोलप्रसाद (डीपी) अर्यालसँग संयुक्त अरब इमिरेट्स (युएई) का विदेश व्यापार मन्त्री महामहिम डा.थानी बिन अहमद अल जेयोउदीले शिष्टाचार भेटवार्ता गरेका छन् ।

भेटमा सभामुख अर्यालले वर्तमान संसद् गठन भएपछि युएईको तर्फबाट भएको यो सबैभन्दा उच्चस्तरीय भ्रमण रहेको उल्लेख गर्दै भ्रमणले नेपाल–युएई सम्बन्धलाई नयाँ उचाइमा पुर्याउने र सहकार्यका नयाँ आयामहरू खुल्ने विश्वास व्यक्त गरेको सभामुखको सचिवालयले जनाएका छ  ।

त्यस्तै, युएईका विदेश व्यापार मन्त्री डा.थानी बिन अहमद अल जेयोउदीले नयाँ सरकार गठनपछि आफ्नो पहिलो भ्रमण रहेको उल्लेख गर्दै भ्रमणले दुई देशबिचको सम्बन्धलाई अझ सुदृढ बनाउने विश्वास व्यक्त गरे ।

नेपालमा लगानीमैत्री वातावरण निर्माणका लागि युएई सरकार सकारात्मक रहेको र प्रविधि, पूर्वाधार, शिक्षा लगायतका क्षेत्रमा लगानी विस्तार गर्न इच्छुक रहेको जेयोउदीको भनाइ थियो । 

मन्त्री जेयोउदीले युएईको विकासमा नेपाली श्रमिकहरूले पुर्याएको योगदानको प्रशंसा गर्दै नेपाल–युएई सम्बन्धलाई थप उचाइमा पुर्याउन दुवै देशबिचको सहकार्य अझ विस्तार गरिने विश्वास व्यक्त गरे ।