गाजाको कुनै पनि क्षेत्र प्यालेस्टिनीहरूका लागि सुरक्षित छैन : ओएचसीएचआर

जेनेभा, ५ साउन । संयुक्त राष्ट्रसङ्घीय मानवअधिकार उच्चायुक्तको कार्यालय (ओएचसीएचआर) ले युद्ध–विराम घोषणा भएको नौ महिना भइ सक्दा पनि गाजा पट्टीका कुनै पनि क्षेत्र प्यालेस्टिनीहरूका लागि सुरक्षित नभएको पुष्टि गरेको छ ।

इजरायली सेनाले युद्ध–विरामको बाबजुत पछिल्लो समयमा गाजा पट्टीका विभिन्न क्षेत्रमा आफ्ना आक्रमणहरू बढाएको जनाइएको छ । जसका कारण अधिकाशं प्यालेस्टिनी महिला तथा बालबालिका लगायत अन्य मानिसहरुले मृत्यु वरण गर्नु परेको ओएचसीएचआरले जनाएको छ । इजारायली सेनाले आवासीय भवनहरू, आन्तरिक रूपमा विस्थापित मानिसहरूलाई आश्रय दिने विस्थापित शिविर र अन्य मानविय जन–घनत्व धेरै भएका क्षेत्रहरूलाई लक्षित गरी आक्रम गर्दा धेरै मानविय क्षति भएको ओएचसीएचआरले प्रष्ट पारेको छ ।

ओएचसीएचआरका प्रवक्ता थमीन अल–खितानले कार्यलयले सन् २०२५ अक्टोबर देखि सन् २०२६ अप्रिलको मध्य सम्म इजरायली आक्रमणमा परी ६८५ जना प्यालेस्टिनी नागरिकको हत्या भएको पुष्टि गरेको छ । जसमा अधिकाशं महिला तथा बालबालिका रहेको जनाउँदै उनले सनाखत तथा प्रमाणिकरणको काम जारी रहेको बताएका छन् ।

गत जुलाई –१३ देखि २० सम्म ओएचसीएचआरलले इजरायली सेनाले छ जना बालबालिका र आठ जना महिलासहित कम्तीमा ५७ जना प्यालेस्टिनीको हत्या गरेको रेकर्ड गरेको छ । यी पीडितहरू मध्ये ३४ जना इजरायली सेनाले लगाएको ’पहेँलो रेखा’ बाट टाढाका क्षेत्रमा मारिएको प्रवक्ताले प्रष्ट पारेका छन् ।

निरन्तरको आक्रमणहरूमा भएको नागरिकहरूको हत्याले गाजामा अन्तर्राष्ट्रिय मानवीय कानूनको उल्लङ्घन र युद्ध अपराध तथा अन्य सम्भावित दुर्घटनाको जोखिम बढेको चिन्ता उत्पन्न गरेको ओएचसीएचआरले चेतावनी दिएको छ । अन्तर्राष्ट्रिय कानुन अनुसार सर्वसाधारणलाई जानाजानी आक्रमण गर्नु युद्ध अपराध भएकोसमेत ओएचसीएचआरको कार्यालयले औंल्याएको छ ।

लामो युद्धका कारण गाजामा प्यालेस्टिनीहरू सँधै सङ्कुचित जिवन बाच्न बाध्य रहेको जनाउदै ओएचसीएचआरले इजरायली कब्जा शक्तिले ’पहेँलो रेखा’ बाट लगातार पश्चिम तिर सर्दै निरिह प्यालेस्टिनीहरूको जीवनलाई निरन्तर खतरामा राखि प्यालेस्टिनीहरू माथि नियमित रूपमा द्वन्द्वको श्रङ्खला चलाएको उल्लेख गरेको छ ।

यसैबीच ओएचसीएचआरका प्रवक्ता अल–खितानले गाजामा प्यालेस्टिनीहरूमाथि निरन्तर जारी गरिएका मानव अधिकार उल्लङ्घन जन्य पीडा र दुःखलाई बेवास्ता गर्न नसकिने विषयमा जोड दिएका छन् ।

सन् २०२३ अक्टोबर –७ देखि गाजा पट्टीमा इजरायली कब्जाले चलाएको नरसंहार जन्य युद्ध बाट मृत्यु हुनेहरुको सङ्ख्या ७३ हजार २९३ पुग्नुका साथै एक लाख ७३ हजार ९०६ जना घाइते भएको जनाइएको छ ।

इजरायली कब्जा बलहरूले गाजा पट्टीका धेरै क्षेत्रहरूमा थप गोलाबारी, छापा र भारी आक्रमण गरेर गाजा पट्टीमा युद्ध–विराम सम्झौताको उल्लङ्घन गर्ने कार्य जारी राखेको पनि ओएचसीएचआरले जनाएको छ । रासस