बर्लिन, १९असोज । जर्मनीले युक्रेनलाई करिब १ अर्ब युरो बराबरको नयाँ सैन्य सहायता उपलब्ध गराउने घोषणा गरेको छ। जर्मन चान्सलर फ्रेडरिक मर्जले आइतबार युक्रेनको राजधानी किएभको भ्रमणका क्रममा नयाँ सहायता प्याकेजको घोषणा गरेको हो।
जर्मन सरकारका अनुसार उक्त सैन्य सहायता प्याकेजको मुख्य प्राथमिकता युक्रेनको हवाई सुरक्षा क्षमता सुदृढ गर्नु रहेको छ। पछिल्लो समय ड्रोन तथा अन्य हवाई आक्रमणको सामना गरिरहेको युक्रेनलाई थप प्रभावकारी रूपमा आफ्नो हवाई क्षेत्र सुरक्षित गर्न सहयोग पुर्याउने उद्देश्यले यो सहायता केन्द्रित गरिएको जनाइएको छ।
नयाँ प्याकेजअन्तर्गत जर्मनीले जेट इन्जिनयुक्त ड्रोनविरुद्ध प्रयोग गर्न सकिने इन्टरसेप्टरको संयुक्त उत्पादनमा समेत सहयोग गर्नेछ। चान्सलर मर्जका अनुसार यस क्षेत्रमा पछिल्लो समय भएका प्राविधिक प्रगतिले युक्रेनको हवाई सुरक्षा प्रणालीलाई तुलनात्मक रूपमा छिटो सुदृढ गर्न सहयोग पुग्ने अपेक्षा गरिएको छ।
यसैगरी, जर्मनीले युक्रेनलाई लामो दूरीका हतियार, भू-उपग्रह प्रविधि तथा लडाकु ड्रोन उपलब्ध गराउने जनाएको छ। यी उपकरण तथा प्रविधिले युक्रेनको रक्षा क्षमता थप मजबुत बनाउन सहयोग पुग्ने जर्मन सरकारको भनाइ छ।
सैन्य सहयोगसँगै जर्मनीले युक्रेनको ऊर्जा पूर्वाधार पुनःस्थापनाका लागि पनि थप आर्थिक सहयोग गर्ने भएको छ। आगामी जाडोयामलाई ध्यानमा राख्दै ऊर्जा संरचनाको मर्मत तथा पुनर्निर्माणका लागि जर्मनीले करिब ३५० मिलियन युरो उपलब्ध गराउने घोषणा गरेको हो।
युक्रेनको ऊर्जा पूर्वाधारमा भएको क्षतिका कारण आगामी जाडोयाममा ऊर्जा आपूर्तिमा चुनौती आउन सक्ने अवस्थामा जर्मनीको उक्त सहयोग महत्वपूर्ण हुने अपेक्षा गरिएको छ। सहायता रकम ऊर्जा संरचनाको मर्मत, पुनःस्थापना तथा आवश्यक पूर्वाधारलाई सञ्चालनमा ल्याउन प्रयोग गरिने जनाइएको छ।
चान्सलर मर्जले पदभार ग्रहण गरेपछि युक्रेनको यो दोस्रो भ्रमण हो। भ्रमणका क्रममा जर्मनी र युक्रेनबीच सैन्य सुरक्षा, हवाई रक्षा तथा ऊर्जा पूर्वाधारसम्बन्धी सहयोगलाई थप मजबुत बनाउने विषयमा जोड दिइएको छ।
जर्मनीले पछिल्लो घोषणामार्फत युक्रेनलाई सैन्य सुरक्षासँगै आगामी जाडोयामका लागि आवश्यक ऊर्जा पूर्वाधार संरक्षण र पुनःस्थापनामा समेत सहयोग जारी राख्ने प्रतिबद्धता व्यक्त गरेको छ। रासस
प्रतिक्रिया