धुलिखेल–खावा सडकमा असार १४ देखि ट्रिपरलाई पूर्ण प्रतिबन्ध, एम्बुलेन्सलाई के हुन्छ ?

काठमाडौँ । अरनिको राजमार्ग अन्तर्गतको धुलिखेल–खावा सडक खण्डमा आगामी असार १४ गतेदेखि २८ गतेसम्म ट्रिपरलाई पूर्ण रूपमा रोक लगाइने भएको छ ।

उक्त सडक खण्डमा भइरहेको सडक निर्माण तथा स्तरोन्नतिको कामलाई तीव्रता दिन सवारी साधन सञ्चालनमा कडाइ गरिने भएको हो ।

काभ्रेपलाञ्चोकका प्रमुख जिल्ला अधिकारी गोपाल कुमार अधिकारीको अध्यक्षतामा बसेको ‘विकास सहजीकरण बैठक’ले निर्माण कार्यलाई यथाशीघ्र सम्पन्न गर्न आगामी असार १४ गतेदेखि २८ गतेसम्म सवारी आवागमनमा रोक लगाउने निर्णय गरेको हो ।

बैठकको निर्णय अनुसार ट्रिपर बाहेकका अन्य यात्रुवाहक र मालवाहक सवारी साधनहरूलाई भने साँझ ७ बजेदेखि बिहान ५ बजेसम्म मात्र प्रवेशमा रोक लगाइने निर्णय भएको छ । तर, एम्बुलेन्स लगायतका अत्यावश्यक सवारी साधनहरू भने पूर्ववत् रूपमै सञ्चालन हुन पाउनेछन् ।

सडक डिभिजन कार्यालय, भक्तपुरका प्रमुखले बैठकमा बाँकी काम गर्ने क्रममा एक लेन सडक बन्द गर्नुपर्ने र एक लेनमा मात्र सवारी चलाउनु पर्ने बाध्यात्मक अवस्था रहेको जानकारी गराएपछि प्रशासनले यस्तो निर्णय लिएको हो ।