गुराँस लघुवित्तका सेयरधनीलाई १० प्रतिशत लाभांश प्रस्ताव

काठमाडौं, २ असोज । गुराँस लघुवित्त वित्तीय संस्थाले गत आर्थिक वर्षको मुनाफाबाट आफ्ना सेयरधनीहरूलाई १० प्रतिशत लाभांश वितरण गर्ने घोषणा गरेको छ । संस्थाको असोज २ गते बसेको सञ्चालक समितिको बैठकले लगानीकर्तालाई उक्त प्रतिफल बाँड्ने प्रस्ताव अघि सारेको हो ।

सञ्चालक समितिको निर्णयअनुसार, सेयरधनीहरूले ९.५ प्रतिशत चुक्ता पुँजीको बोनस सेयर प्राप्त गर्नेछन् । त्यस्तै, सो बोनस सेयरमा लाग्ने कर तिर्नका लागि संस्थाले ०.५ प्रतिशत नगद लाभांशसमेत छुट्याएको जनाएको छ ।

सञ्चालक समितिले सिफारिस गरेको यो लाभांश तत्कालै भने वितरण हुनेछैन । यसका लागि नियामक निकाय नेपाल राष्ट्र बैंकले स्वीकृति दिनुपर्नेछ । राष्ट्र बैंकको अन्तिम स्वीकृतिपछि संस्थाको आगामी वार्षिक साधारण सभाबाट अनुमोदन भएपछि मात्रै सेयरधनीहरूले उक्त लाभांश हात पार्नेछन् ।