भोजपुर, १३ पुस । भौगोलिक विकटताका कारण नगरपालिका केन्द्रसम्म पुग्न कठिनाइ भोग्दै आएका नागरिकलाई लक्षित गर्दै यहाँको षडानन्द नगरपालिकाले वडास्तरमै योजना सम्झौता तथा उपभोक्ता अभिमुखीकरण कार्यक्रम सञ्चालन गरेको छ ।
स्थानीय नागरिकलाई सहज सेवा प्रदान गर्ने र विकास योजनाको प्रभावकारी कार्यान्वयन सुनिश्चित गर्ने उद्देश्यले नगरपालिकाले नागरिकको घरदैलोमै पुगेर सेवा प्रवाह थालेको हो ।
नगरपालिकाले वडास्तरमै योजना सम्झौता, बैंकिङ सेवा, योजना सञ्चालन विधि, गुणस्तर मापदण्ड, प्रभावकारिता र कार्यान्वयनका आवश्यक प्रक्रियासम्बन्धी अभिमुखीकरण कार्यक्रमसमेत सञ्चालन गरेको षडानन्द नगरपालिकाका प्रमुख प्रशासकीय अधिकृत मणिराम लामाले जानकारी दिए ।
भौगोलिक विकटताका कारण नगर केन्द्रसम्म आउन स्थानीयले भोग्नुपरेका समस्यालाई ध्यानमा राख्दै सेवा वडास्तरबाटै सञ्चालन गरिएको उहाँको भनाइ छ । नगरपालिकाका १४ वटा वडामध्ये भौगोलिक रूपमा अत्यन्तै विकट रहेका वडाका नागरिकलाई प्राथमिकताका साथ वडास्तरबाट सेवा प्रदान गरिएको प्रमुख प्रशासकीय अधिकृत लामाले बताए । पुस ५ गतेदेखि अभियानकै रूपमा सेवा प्रवाह सुरु गरिएको उनले जानकारी दिए ।
“सेवालाई सहज र सरल रूपमा नागरिकसम्म पुर्याउने लक्ष्यका साथ काम गरिरहेका छौँ”, प्रमुख प्रशासकीय अधिकृत लामाले भने, “कतिपय वडाका नागरिकलाई नगरपालिकासम्म आइपुग्न निकै कठिन हुन्छ । त्यसैले अभियान नै सञ्चालन गरेर घरदैलोमा सेवा पुर्याएका हौँ ।”
नगरपालिकाबाट सञ्चालन हुने योजनालाई समयमै र प्रभावकारी रूपमा सम्पन्न गराउने उद्देश्यले अनुगमन र कार्यान्वयन प्रक्रियालाई थप कडाइका साथ अघि बढाइने उनले बताए ।
स्थानीय सरकार भएकाले नागरिकलाई प्रदान गरिने सेवामा सहजता ल्याउन र योजनालाई गुणस्तरीय बनाउने लक्ष्यसहित वडास्तरबाट सेवा प्रवाह गरिएको षडानन्द नगरपालिका उपप्रमुख प्रमिला राईले बताइन् । भौगोलिक रूपमा ठूलो र विकट क्षेत्रसमेत समेटिएको नगर भएकाले सेवाको पहुँच विस्तार गर्न वडास्तरमै कार्यक्रम सञ्चालन गरिएको उनको भनाइ छ ।
“विकट पुगेर वडाबाटै योजना सम्झौता गरेका छौँ”, उपप्रमुख राईले भनिन्, “नगरपालिकासम्म आउँदा नागरिकको समय र खर्च दुवै बढी लाग्ने भएकाले घरदैलोमै सेवा पुर्याउने प्रयास गरेका हौँ ।”
नगरपालिकावासीले भौगोलिक विकटताका कारण केन्द्र दिङ्लासम्म आइपुग्दा भोग्नुपर्ने समस्यालाई ध्यानमा राख्दै वडास्तरबाट सेवा प्रवाह गरिएको षडानन्द नगरपालिका प्रमुख सुरेन्द्रकुमार उदासले बताए । नागरिकलाई सहज सेवा प्रदान गर्न अभियान सञ्चालन गरिएको र आगामी दिनमा समेत यसलाई निरन्तरता दिइने उनले जानकारी दिए ।
“नागरिकलाई सहज सेवा दिने लक्ष्यका साथ वडास्तरबाट नगरको सेवा प्रवाह गरिरहेका छौँ”, नगरप्रमुख उदासले भने, “घण्टौँ यात्रा गरेर सेवा लिन आउँदा समय र हजारौँ रुपैयाँ खर्चिनुपर्ने बाध्यता हटाउन यो अभियान प्रभावकारी भएको छ । यसले योजनाको कार्यान्वयन र प्रभावकारिता दुवै बढ्नेछ ।” रासस
प्रतिक्रिया