काठमाडौं, चैत २५ । सरकारले गठन गरेको ‘संविधान संशोधन बहसपत्र’ तयार पार्न गठन गरेको कार्यदलको पहिलो बैठक आज बस्दैछ । प्रधानमन्त्री वालेन्द्र शाह नेतृत्वको सरकारले गत चैत १३ गते सार्वजनिक गरेको ‘शासकीय सुधारसम्बन्धी एक सय बुँदे कार्यसूची’ को बुँदा नम्बर ४ मा यो कार्यदल गठन गर्ने व्यवस्था गरिएको थियो ।
आज दिउँसो ३ बजे प्रधानमन्त्री तथा मन्त्रिपरिषद्को कार्यालयमा कार्यदलको बैठक प्रधानमन्त्रीका राजनीतिक सल्लाहकार असिम शाहको संयोजकत्वमा बस्न लागेको हो
कार्यदलमा राष्ट्रिय स्वतन्त्र पार्टी (रास्वपा)का तर्फबाट मोहन आचार्य, नेकपा (एमाले) का तर्फबाट संविधान सभाका तत्कालीन सदस्य डा. भीष्मनाथ अधिकारी, नेपाल कम्युनिष्ट पार्टी (नेकपा)का तर्फबाट संविधान सभाका तत्कालीन सदस्य एवं पूर्व कानुनमन्त्री देव प्रसाद गुरुङ्ग, राष्ट्रिय प्रजातन्त्र पार्टी (राप्रपा)का तर्फबाट संसदीय दलका नेता ज्ञानेन्द्र शाही र राष्ट्रिय जनमोर्चाका तर्फबाट महासचिव मनोज भट्ट सदस्यका छन् ।
नेपाली कांग्रेस, श्रम संस्कृति पार्टी, जनता समाजवादी पार्टी, नेपाल र लोकतान्त्रिक समाजवादी पार्टी, नेपालबाट कार्यदल सदस्यको नाम टुङ्गो लाग्न बाँकी छ ।
कार्यदलले पूर्वराष्ट्रपति, संविधानविद्, कानुनी व्यवसायी, पूर्वप्रधानन्यायाधीश, सञ्चारमाध्यम, धार्मिक संस्था, निजी क्षेत्र, जेन–जी पुस्ताका अगुवा र स्थानीय तहका प्रतिनिधिहरूसँग चरणबद्ध रूपमा बृहत् छलफल गरेर संविधान संशोधन बहसपत्रलाई पूर्णता दिनेछ ।
प्रतिक्रिया