काठमाडौं । औषधि व्यवस्था विभागले बजारमा सेरोफ्लो रोटाक्याप नामक औषधिको नक्कली संस्करण फेला परेको भन्दै सचेत रहन अपील गरेको छ ।
विभागले बुधबार एक सूचना जारी गर्दै भारतको सिक्किमस्थित सिप्ला लिमिटेडले उत्पादन गरेको श्वासप्रश्वास सम्बन्धी यो औषधिको नक्कली प्रतिलिपि बिक्री वितरण भइरहेको जनाएको हो । विभागले सम्पूर्ण चिकित्सक, फर्मासिस्ट, अस्पताल, औषधि व्यवसायी तथा सर्वसाधारणलाई सचेत रहन आग्रह गरेको छ ।
विभागका अनुसार नक्कली औषधिको प्रयोगले स्वास्थ्यमा गम्भीर असर पार्न सक्ने भएकाले औषधि खरिद गर्दा आधिकारिक फार्मेसीबाट मात्र किन्न, लेबल र विवरण ध्यानपूर्वक जाँच्न तथा शंकास्पद अवस्थामा प्रयोग नगर्न आग्रह गरिएको छ। साथै, त्यस्ता औषधि भेटिएमा नजिकको स्वास्थ्य संस्था वा सम्बन्धित निकायमा जानकारी गराउन समेत भनिएको छ।
प्रतिक्रिया