काठमाडौं, १५ पुस । प्रधानमन्त्री सुशीला कार्कीले राष्ट्र, राष्ट्रियता, धर्म, संस्कृति तथा नागरिक बचाउ महाअभियानका संयोजक दुर्गा प्रसाईँलाई भगवान गौतम बुद्धको तस्वीर उपहार दिँदै देशमा शान्ति कायम राख्न आग्रह गरेकी छन् । आज (मंगलबार) विहान प्रसाईँ बालुवाटार पुगेका थिए । सो क्रममा प्रधानमन्त्री कार्कीले अब मुलुकले अस्थिरता र अशान्ति थेग्न नसक्ने भन्दै आफ्ना माग र असन्तुष्टिहरु शान्तिपूर्ण माध्यमबाट राख्न आग्रह गरिन् ।
‘हामी पनि न्यायका पक्षधर हौँ । यहाँ सत्ताभोग र सुखसयल गर्न आएका होइनौँ। भ्रष्टाचारको अन्त्य, शोषित, पीडित वर्गलाई न्याय दिलाउने प्रक्रियाको थालनी गरेका छौँ। सबै कुराको नतिजा रातारात नदेखिए पनि हामीले आधारशीला तयार पार्दै गएका छौँ। तपाईँले उठाउनुभएका कतिपय जायज मुद्दाको सम्बोधनका लागि पनि सरकारले गृहकार्य गरिरहेकै छ। अझै थप छलफल गर्दै जाऔँला,’– प्रसाईँसँग प्रधानमन्त्री कार्कीले भनिन् ।
प्रधानमन्त्री कार्कीले मुलुकमा शान्ति र अमनचैन कायम राखी दीगो लोकतन्त्र स्थापना गर्ने एक मात्र माध्यम निर्वाचन रहेको भन्दै यसमा सहयोग गर्न सबैलाई आग्रह गरिन् । मुलुक निर्वाचनमा होमिइसकेको जानकारी दिँदै उनले अब जनताबाट आफ्ना मुद्दा अनुमोदन गराउनु नै लोकतान्त्रिक निकासको एक मात्र विकल्प रहेको बताईन् ।
‘धेरै अप्ठ्यारो अवस्थाबाट मुलुकलाई शान्ति सुव्यवस्थामा फर्काएका छौँ । सबै खालका संशयहरुलाई चिर्दै मुलुक पूर्णरुपमा निर्वाचनको माहोलमा होमिएको छ। यस्तो बेलामा सबै पक्षबाट जिम्मेवार भूमिकाको अपेक्षा हामीले गरेका छौँ। यो देश मेरो पनि हो भन्ने सोच राखेर सबै पक्ष जिम्मेवार बनौँ,’– प्रधानमन्त्री कार्कीले भनिन् । तस्बिरः केशव थापा/प्रधानमन्त्रीको सचिवालय
प्रतिक्रिया