काठमाडौं । नेपाली कांग्रेसले १४औँ महाधिवेशनबाट निर्वाचित निवर्तमान केन्द्रीय सदस्यहरूलाई आगामी १५औँ महाधिवेशनको प्रक्रियामा पुनः सहभागी गराउने निर्णय गरेको छ। पार्टीको केन्द्रीय कार्यसम्पादन समितिको आइतबार बसेको बैठकले वडा अधिवेशनमा सहभागी हुने निवर्तमान केन्द्रीय सदस्यलाई वर्तमान केन्द्रीय समितिमा समेट्ने निर्णय गरेको हो।
बैठकले असोज ३ र ४ गते हुने वडा अधिवेशनमा सहभागी हुन पार्टीका नेता तथा कार्यकर्तालाई आह्वानसमेत गरेको छ। महामन्त्री प्रदीप पौडेलका अनुसार निवर्तमान केन्द्रीय सदस्यहरू सम्बन्धित वडामा पुगेर अधिवेशन प्रक्रियामा सहभागी भए उनीहरूलाई केन्द्रीय समितिमा समेटिनेछ।
कांग्रेसको संशोधित विधानले यसपटक केन्द्रीय सदस्यसमेत सम्बन्धित वडाबाट निर्वाचित भएर आउनुपर्ने व्यवस्था गरेको छ। यसअघि केन्द्रीय सदस्यहरू स्वतः महाधिवेशन प्रतिनिधि बन्ने प्रावधान रहे पनि नयाँ व्यवस्थामा उक्त प्रचलन हटाइएको छ।
बैठकपछि एक पदाधिकारीले अघिल्लो केन्द्रीय समितिमा रहेका सबैलाई नयाँ समितिमा सहभागी हुन आह्वान गरिने जानकारी दिए। विशेष महाधिवेशनपछि तत्कालीन सभापति शेरबहादुर देउवा नेतृत्वको समितिमा रहेका केही नेता नयाँ केन्द्रीय समितिमा समेटिएका थिएनन्। पछिल्लो निर्णयसँगै उनीहरूलाई पुनः पार्टीको केन्द्रीय संरचनामा फर्किने अवसर खुलेको छ।
कांग्रेसले १५औँ महाधिवेशन असोज १६ देखि १९ गतेसम्म गर्ने कार्यतालिका यसअघि नै तय गरिसकेको छ। त्यसअघि असोज ३ र ४ गते वडा तहको अधिवेशन सम्पन्न गर्ने तयारी छ।
महाधिवेशनको तयारीकै क्रममा पार्टीले क्रियाशील सदस्यताको विषयमा पनि निर्णय गरेको छ। संस्थापन पक्षले गत पुससम्म नवीकरण भएका सबै क्रियाशील सदस्यलाई मान्यता दिने निर्णय गरेको छ।
निवर्तमान केन्द्रीय समितिका सबै सदस्यलाई समेटेर महाधिवेशन आयोजक समितिका रूपमा अघि बढाउने निर्णयसँगै कांग्रेसले १५औँ महाधिवेशनको तयारीलाई थप व्यवस्थित र समावेशी ढंगले अघि बढाउने संकेत दिएको छ।
प्रतिक्रिया